Komisaun A prepara ezbosu Lei Protesaun Dadus Pesoál atu diskute
DILI, 31 Agostu 2026 (TATOLI)-Komisaun A ba Asuntu Konstitusionál no Justisa prepara ona ezbosu Lei Protesaun Dadus Pesoál no sei submete ba meza Parlamentu Nasionál, iha fulan-Setembru ne’e, atu halo diskusaun.
Prezidente Komisaun A, Natalino dos Santos, hatete Komisaun foin lala’is halo ona estudu komparativu iha país sira iha Asosiasaun Nasaun Sudeste Aziátiku (ASEAN, sigla portugés) hodi haree esperiénsia implementasaun kona-ba lejizlasaun ne’e. Ho ida-ne’e deputadu sira iha ona koñesimentu no abilidade bainhira diskute no aprova lejizlasaun ne’e iha tempu tuirmai.
Lembra kata Parlamentu Foinsa’e iha Edisaun Dalimak tinan 2026, propoin aprovasaun lei ida ne’ebé proteje dadus pesoál no sidadaun ne’ebé regula utiliza Intelijénsia Artifisiál (AI).
Sujere atu lei ne’e bele sansiona sé mak rekorre ba iha AI hodi kria vídeo, imajen, áudiu falsifikadu, kauza danu reputasaun ou dignidade terseiru hodi asegura simultaneamente protesaun regula privasidade sidadaun.
Deputadu Komisaun A, Patrocínio dos Reis Fernandes, dehan Lei Protesaun Dadus Pesoál no Seguransa Dijitál ne’e pertinente tebes.
Nia dehan preokupasaun sira ne’e pertinente la’ós de’it Parlamentu Foinsa’e nian, maibé públiku tomak. Maibé prosesu atu haree lejizlasaun sira ba asuntu kompleksu presiza liuhusi análize profunda no tenke estuda husi aspetu hothotu sai duni nu’udar matadalan atu Estadu haree no proteje nasaun no sidadaun sira husi konvivénsia plataforma dijitál sira.
Deputadu ne’e realsa katak prosesu la’o hela, Governu mós avansa hela proposta lei sira atu mai husu autorizasaun iha Parlamentu no Parlamentu rasik liuhusi Komisaun A halo ona estudu komparativu atu trata inisiativa lejizlativa sira ne’e.
Meza Parlamentu baixa ona proposta Lei Siberseguransa ba Komisaun A hodi fó pareser.
Governu submete ona proposta lei ba órgaun lejizlativa ne’ebé husu autorizasaun lejislativa hodi aprova pakote lejizlativu integradu ida kona-ba siberseguransa, ne’ebé kobre krime no prosesu kriminál sira iha ámbitu dijitál no definisaun rejime jurídiku siberespasu nasionál.
Notísia relevante: MJ finaliza ona ezbosu Lei Protesaun Dadus Pesoál
Jornalista: Nelson de Sousa
Editora: Maria Auxiliadora
