SECoop prepara kuda Bafo Kayrala substitui hahan seluk iha bailoro naruk
DILI. 31 Agostu 2026 (TATOLI)—Sekretáriu Estadu Kooperativa (SECoop, sigla portugés), Arsénio Pereira, hateten ho mudansa klimátika bailoro naruk (elnino) ne’e sei fó impaktu ba buat hotu liuliu produsaun aihán, tanba ne’e sira prepara kuda Bafo Kayrala hodi substitui hahán seluk iha tempu bailoro naruk.
“Ha’u hanoin buat ida fenomena natureza ne’e ninia efeitu la’ós de’it ba servisu SECooP nian maibé ne’e parte seluk mós katak la’ós de’it ba produsaun produtu kooperativa maibé ba mós balada no ema tanba bee maran no rai manas,” Sekretáriu Estadu ne’e informa ba jornalista sira iha edifísiu Korreiu, ohin.
Nia dehan, mudansa klimátika elnino ne’e akontese sei fó impaktu ba buat moris hotu iha mundu.
“Wearning (avizu) ne’e husi ita-nia Prezidente Repúblika, José Ramos-Horta rasik no Estadu husi mundu tomak deklara katak ho akontesimentu bailoro naruk preparasaun saida mak ita sei halo,” nia relata.
Tanba ne’e, nia konsidera natureza entaun Timor-Leste nia preparasaun la’ós atu kombate maibé bele halo mitigasaun, tanba dalaruma iha impaktu ba Timor-leste nia produsaun bele menu no bee mós maran.
“Nune’e mak SECoop iha programa kuda Bafo Kayrala. Tanba sai hahán ne’ebé ita bele asegura (rezerva) tanba produtu ne’e bele moris mós iha tempu bailoro,” nia dehan.
Jornalista : Alexandra da Costa
Editór : Cancio Ximenes
