Venezuela anunsia akordu petrolíferu ho EUA vigora durante tinan 25
DILI, 31 Agostu 2026 (TATOLI) – Prezidente interinu Venezuela nian, Delcy Rodriguez, fó-sai katak, akordu ida kona-ba petróleu ne’ebé hetan ho EUA sei vigora nafatin durante tinan 25 no hakarak aumenta produsaun petróleu loron-loron nasaun nian ba liu barríl millaun 1,5.
Bainhira ko’alia ba emizora estatál VTV, iha loron-sábadu, Rodriguez komenta kona-ba saida maka nia deskreve hanesan akordu petróleu “istóriku” ne’ebé hetan ho EUA.
Rodriguez hatete katak akordu ne’e sei vigora nafatin durante tinan 25 no hakarak hasa’e produsaun petróleu loroloron nian liu barríl millaun 1,5.
“Ami-nia objetivu maka avansa liután ho asinatura hosi akordu boot sira seluk ne’ebé envolve empreza jigante sira hanesan Chevron, Repsol, Eni, Shell ho BP. Ami hakarak sai hanesan poténsia enerjétiku ida,” nia hatete.
“Iha termu konkretu, ida-ne’e signifika katak maizumenus $19 ba kada barríl ne’ebé prodús no fa’an sei ba diretamente ba ita-nia rain.”
Bainhira ko’alia kona-ba kontribuisaun ne’ebé hein hosi akordu ba ekonomia Venezuela nian, Rodriguez hatete katak, bazea ba folin petróleu nian ida ho dolár 65 kada barríl, nasaun ne’e bele hamosu reseita dolár tokon $209,335 hosi akordu ne’e.
Rodriguez hatete katak projetu ne’e kobre dezenvolvimentu hosi kampu petróleu brutu ualu iha Orinoco Oil Belt, ne’ebé maka hale’u liu kilómetru kuadradu 55,000 (21,235 millas kuadradu) iha leste no leste-sentrál Venezuela nian.
Nia hatete katak akordu prevee taxa royalty ida pelumenus 16% no taxa impostu rendimentu ida 34%, hodi hatutan katak termu sira-ne’e sei aselera rekuperasaun ekonómika Venezuela nian.
Rodriguez agradese ba Prezidente Estadus Unidus nian Donald Trump no Sekretáriu Estadu Estadus Unidus nian Marco Rubio ba sira-nia esforsu sira hodi hetan akordu, hodi hatete katak “parte ida-idak kontribui ho saida maka sira halo di’akliu.”
“Tenki sai klaru tebes katak Venezuela mantein propriedade no soberania ba nia rekursu sira,” nia hatete.
Rodriguez hatutan tán katak EUA sei fornese kapitál, teknolojia no kapasidade operasionál hodi aselera rekuperasaun setór estratéjiku petrolíferu Venezuela nian, ne’ebé afetadu maka’as hosi sansaun sira.
Subliña katak Governu sei sai transparente ho venezuelanu sira, Rodriguez hatete katak sira “iha direitu atu hatene investimentu hira maka prodús, reseita hira maka Estadu simu no saida maka kondisaun sira ba operadór sira.”
Trump hatete iha loron-sesta ne’e katak Washington finaliza ona akordu ida ho Venezuela hodi asegura kontrolu maioria ba rezerva petróleu nian ne’ebé komprovadu liu barríl billaun 65.
“Estadus Unidus Amérika foin tama iha akordu ida ho nasaun Venezuela kona-ba akordu petróleu boot liu iha istória mundiál”, nia hakerek iha ninia plataforma mídia sosiál Truth Social.
Nia fó kréditu ba Rubio no Sekretáriu Defeza Pete Hegseth tanba serbisu hamutuk ho Rodriguez hodi finaliza tranzasaun. Rodriguez asume prezidénsia interinu iha fulan-Janeiru hafoin operasaun militár norte-amerikanu ida kaptura Prezidente Nicolás Maduro.
Trump afirma katak akordu ne’e hetan liuhosi parseria ida ho indústria privada no sei la envolve kustu ba kontribuinte amerikanu sira.
Nia afirma katak tranzasaun ne’e duplika liu rezerva petróleu sira ne’ebé eziste iha EUA no sei “hamenus maka’as folin gás nian” ba ema amerikanu sira iha tempu naruk, enkuantu promove prosperidade iha nasaun súl-amerikanu.
Akordu ne’e sei hametin relasaun ne’ebé evolui lalais entre Washington ho Caracas, hatete hosi Trump.
Rubio hatete katak akordu ne’e hanesan “vitória boot ida” ba nasaun rua, no katak sei lori investimentu privadu besik dolar biliaun 100 ba Venezuela.
Notísia relevante: Venezuela anunsia akordu petrolíferu ho EUA
Fonte: Anadolu
