Delegasaun husi Iemen vizita CNC atu aprende istória Timor-Leste
DILI, 01 Setembru 2026 (TATOLI)—Delegasaun husi Iemen hamutuk ema na’in-25, tersa ne’e, vizita Centro Nacional Chega, Institutu Públiku (NCN, I.P) ho objetivu atu aprende istoria Timor-Leste nian.
Ofisiál Asuntu Polítiku husi Gabinete Enviadu Espesiál ONU, Iemen, Shadha Al Harazi hanesan responsavel ba área justisa tranzisionál, hateten katak objetivu vizita Timor-Leste liuhusi Hikma Fellowship atu aprende kona-ba prosesu harii dame no justisa tranzisionál iha Timor-Leste.’
‘Durante vizita, nia no delegasaun vizita CNC (Centro Nacional Chega) no muzeu sira ne’ebé rai no hatudu memória kona-ba atrocidade no violasaun sira-ne’ebé akontese iha tempu pasadu,” Shadha Al Harazi dehan ba jornalista sira iha CNC Balide, ohin.
Nia konsidera, esperiénsia ne’e importante tebes tanba bele aprende oinsá ema no lideransa Timor-Leste servisu hamutuk atu halo rekonsiliasaun, hasees diferensa no trata ferida no injustisa husi pasadu, liuliu ba vítima sira.
”Ha’u hato’o apresiasaun tanba oportunidade atu mai Timor-Leste no aprende diretamente husi esperiénsia nasaun ne’e iha peace building no transitional justice,” nia informa.
Iha fatin hanesan, Diretór Ezekutivu Centro Nacional Chega, Hugo Maria Fernandes, hateten delegasaun husi Republika Iemen sira mai vizita Timor-Leste ne’ebé halo kooperasaun ho g7+ no CNC, I.P.
“Sira normalmente mai tanba ita hotu hatene ema nia konflitu tinan naruk ona no sira haree Timor-Leste sai nasaun ida-ne’ebé atu aprende kona-ba asuntu oioin,” Hugo Fernandes esplika.
Durante loron lima sira vizita fatin barak, normalmente sira hakarak aprende oinsá mak Timor-Leste depois konflitu naruk bele harii lalais dame, bele halo desenvolvimentu sira-ne’ebé mak hanesan agora daudaun akontese.
“Ida-ne’e mak sira vizita CNC atu aprende kona ba oinsa mak TL harii prosesu sira ba dame nian,” nia dehan.
Notisia relevante: Delegasaun husi Iémen hasoru Alkatiri, hakarak aprende lisaun Timor-Leste hahú husi pos-konflitu to’o rekonsiliasaun
Jornalista : Felicidade Ximenes
Editór : Cancio Ximenes
