Media Tour Estranjeiru 2026 bá Guangxi ofisialmente hahú, foka ba komérsiu internasionál foun
NANNING, 01 Setembru 2026 (TATOLI)—Programa Media Tour Estranjeiru 2026 ofisialmente hahú iha Tersa ne’e ho tema “Foka ba koridór komérsiu terrestre-marrítimu internasionál foun, kria projetu foun ba prosperidade tasi”, iha Nanning, sidade kapitál Guangxi, Repúblika Populár Xina
Eventu ne’ebé realiza durante loron-neen ne’e partisipa husi jornalista no content creator hamutuk na’in-34 husi organizasaun mídia 26 iha nasaun ASEAN, Koreia, Hong Kong, Makau no Xina.
Serimónia ne’e organiza husi Gabinete Informasaun Governu Guangxi, China News Service, no implementa husi China News Service Guangxi Branch inklui Guangxi Beibu Gulf International Port Group Co., Ltd.
Partisipante sira sei vizita fatin importante sira iha Guangxi hodi haree direta dezenvolvimentu rejiaun, liuliu Kanál Pinglu ne’ebé sai projetu prinsipál husi koridór komérsiu terrestre-marrítimu internasionál foun. Kanál ne’ebé naruk kilometru 134,2 ne’ebé sei liga Mota Xijiang iha norte ho Portu Internasionál Beibu Gulf iha Súl.
Notísia relevante:Governu-Sekretariadu Expo Xina-ASEAN organiza Roadshow Globál CAEXPO ba da-23
Vise-Sekretáriu CPC husi China News Service, Gu Haikao, hateten, tinan ne’e marka pasu importante ida ba Guangxi tanba Kanál Pinglu hanesan projetu prinsipál ba koredór foun komérsiu tasi no rai internasional ofisialmente loke ona ba navegasaun.
“Kanál ne’e konekta iha norte ho Beibu Gulf International Gateway Port iha sul. Ho ne’e, Guangxi muda nia pozisaun husi rejiaun interiór ba rejiaun fronteira ne’ebé nakloke ba mundu liuhusi tasi”.
Ofisiál Guangxi, Huang Ping-Liang, hatutan, Kanál Pinglu ne’e hanesan projetu kanál dahuluk iha istória Repúblika Populár Xina ne’ebe konekta diretamente bee-dalan interiór ho tasi.
“Hafoin Kanal Pinglu ne’e funsiona, nia sei loke dalan tasi ho folin baratu no fasil liu ba rejiaun Sudeste Guangxi no Sudeste Xina atu asesu ba Tasi Leste no nasaun ASEAN sira,” nia akresenta.
Nune’e mós, Sekretáriu Komité Guangxi Beibu Gulf International Port Group, Chen Dingsong, relata katak Portu Beibu Gulf daudaun opera ona rota kontentór hamutuk 103 inklui 50 ba nasaun ASEAN. Grupu ne’e mós harii ona projetu transporte intermodal mota-ba-tasi hamutuk 29 iha área Kanál Pinglu.
Bainhira Kanál Pinglu hahú operasaun iha Setembru tinan ne’e, sei hamenus distánsia viajen kilómetru 560 husi Sudeste Xina bá tasi no hamenus kustu lojístika to’o 20%. Nune’e, kondisaun ne’e sei kria ‘auto-estrada’ foun iha tasi iha ámbitu komérsiu entre Xina no ASEAN.
Aleinde ne’e, projetu ne’e sei hametin kooperasaun entre Xina no ASEAN, hodi fó impaktu boot ba konstrusaun husi komunidade parte rua nian.
Jornalista : Julia Chatarina
Editór : Florencio Miranda Ximenes
