Sarani sira presta omenajen ba restu mortál preladu katóliku iha Tasi-Tolu

DILI, 01 Setembru 2026 (TATOLI) – Sarani sira presta omenajen ba restu mortál preladu katóliku Don Jaime Garcia Goulart, Don José Joaquim Ribeiro, Monseñor Martinho da Costa Lopes, no Don Alberto Ricardo da Silva, iha kalan ne’e, iha Tasi-Tolu, Dili.

Tuir sekuénsia programa Konferénsia Episkopál Timorense (CET, sigla portugés) nian, ohin kalan husi  tuku 19:00 to’o 23:00  loké ba públiku vizita jerál hodi presta omenajen no velóriu ba restu mortál preladu sira-nian.

Tuir observasaun jornalista Tatoli, sarani sira lubun, padre, madre, eskuteiru presta omenajen ne’ebé akompaña ho reza hodi fó onra no glória ba preladu sira hodi hetan pás iha reinu lalehan nian.

Bibán ne’e, akompaña mós husi Arsebispu Metropolitana Dili no Prezidente CET, Kardeál Don Virgílio do Carmo da Silva, no Ministru Administrasaun Estatál (MAE), Tomás Cabral.

Rosita Vitoriana, nu’udar sarani espresa ninia sentiment emosionál durante presta omenajen. Nia dehan, prezensa restu mortál preladu sira-nian hametin liután memória istórika ba kontribuisaun igreja nian ba país ne’ebé hamriik hamutuk ho povu iha situasaun defísil.

Iha fatin hanesan, Jonato dos Santos, espresa katak momentu ida-ne’e sai istóriku hodi hametin liután Igreja Katólika nian. Tuir Nia, legadu husi preladu sira ba serbí igreja haklaken evanjellu Maromak sai nafatin memória viva hodi hatutan ba nafatin husi povu Timor-Leste.

“Hein katak, prezensa espirituál ne’e kontinua hametin unidade sarani no timoroan sira”, nia hato’o.

Restu mortál preladu Igreja Katólika na’in-tolu, Don Jaime Garcia Goulart, Don José Joaquim Ribeiro no Monseñor Martinho da Costa Lopes, to’o iha Aeroportu Internasionál Nicolau Lobato, Dili, pur volta tuku 13:h2 otl, hafoin translada husi Postugál mai Bali, Indonézia.

Xegada preladu katóliku sira ne’e simu direta husi sarani, Igreja Katólika, relijiozu sira, órgaun soberania sira, autoridade militár no seguransa hodi dijire bá Tasi-Tolu no iha lokraik kontinua ho misa abertura.

Oráriu transladasaun Monseñor Martino nia bá Postu Administrativu Laleia iha aban (02/09). Nune’e mós Don Jaime Garcia Goulart sei bá vizita Institutu Superiór Filozofia no Teolojia (ISFIT), enkuantu Don Alberto Ricardo no José Joaquim Ribeiro hela nafatin iha Tasi-Tolu.

Igreja nafatin loke espasu ba sarani sira atu halo orasaun iha Esplanada Tasi-Tolu ba urna bispu sira, tuir lista ne’ebé fó sai ona to’o loron 09 Setembru kalan no iha 10 Setembru halo despedida no haloot iha lorokraik iha Katedrál, Dili.

Notísia relevante: https://tatoli.tl/2026/09/01/preladu-bispu-nain-haat-sai-ai-riin-ba-povu-no-nasaun-tl/

Jornalista: Nelson de Sousa

Editora: Maria Auxiliadora