Timor-Leste no Indonézia kontinua halo negosiasaun fronteira marítima ba ronda dahaat
DILI, 01 Setembru 2026 (TATOLI) — Governu Timor-Leste ho Indonézia, kontinua halo negosiasaun kona-ba delimitasaun fronteira marítima ba ronda dahaat nian iha Jakarta (Indonézia) hosi loron 01 to’o loron 3 fulan-Setembru 2026.
Iha abertura, Xefe gabinete Primeiru-Ministru no Diretora Ezekutiva Gabinete Fronteiras Terrestres no Marítima, Elizabeth Exposto hato’o apresiasaun bá Governu Indonézia no delegasaun Indonézia tanba sai uma-na’in bá diskusaun sira no subliña importánsia hosi delimitasaun fronteira marítima bá relasaun bilaterál entre nasaun rua ne’e.
“Ba ha’u no bá delegasaun Timor-Leste, hanesan priviléjiu ida atu kontinua diálogu importante ida-ne’e ho ita-nia kolega sira hosi Repúblika Indonézia, iha espíritu amizade, respeitu bá malu no kooperasaun ne’ebé durante tinan barak fó ona fundasaun importante bá relasaun entre ita-nia nasaun rua,” Elizabeth Exposto hateten iha diskursu ne’ebé hala’o iha Indonézia.
Negosiasaun sira-ne’e hatudu kompromisu hamutuk Timor-Leste ho Indonézia nian hodi tenta rezolve kestaun ne’e liu-hosi diálogu no ho respeitu bá Lei Internasionál.
Bazeia ba ajenda ne’ebé iha katak iha ronda da-haat nian sei kontinua prosesu negosiasaun iha Jakarta, tuir ronda dahuluk iha Dili hosi loron 19 to’o 20 Agostu 2025. Ronda daruak nian hala’o iha Jogjakarta hosi loron 8 to’o 10 Dezembru 2025 no ronda datolu nian hala’o iha Singapura hosi 27 to’o 29 Abril 2026.
Enkuantu iha prosesu negosiasaun fronteira marítima entre Timor-Leste ho Indonézia sei envolve fontes prinsipál sira hanesan, Timor-Leste sei lidera hosi Xefe gabinete Primeiru-Ministru no Diretora Ezekutiva Gabinete Fronteiras Terrestres no Marítima, Elizabeth Exposto. Enkuantu delegasaun Indonézia ne’e lidera hosi Embaixadór Ricky Suhendar.
Aleinde ne’e Ofisiál superiór sira no ekipa téknika sira hosi nasaun rua ne’e sei partisipa iha diskusaun estruturadu sira bá akordu ida ne’ebé konsistente ho Lei Internasionál no Konvensaun Nasoins Unidas nian kona-bá Direitu Tasi nian (UNCLOS, sigla inglés).
Jornalista: Alexandra da Costa
Editór: Cancio Ximenes
