Estrada liga suku Maleubu bá Atsabe normaliza hikas
BOBONARU, 02 Setembru 2026 (TATOLI)-Komunidade suku Maleubu, postu administrativu Bobonaru, munisípiu Bobonaru, asesu hikas estrada no ponte ne’ebé liga postu administrativu Atsabe, munisípiu Ermera, hafoin Instititu Jestaun Ekipamentu no Apoia Dezenvolvimentu Infraestrutura (IGEADI) Brigada Maria Tapó halo normalizasaun iha semana kotuk.
Xefe Suku Maleubu, Quintiliano Barros, konsidera intervensaun ne’e bele fasilita ona movimentasaun públiku ne’ebé paradu durante fulan barak nia laran. “Agora ita-nia komunidade asesu di’ak ona [estrada] durante semana ida”, Quintiliano informa ba Tatoli, ohin.
Aleinde ne’e, Komunidade Kompleks Hauba, Deolindo de Jesus, agradese ba IGEADI no fiar katak iha tempu badak Governu hahú ona implementa projetu reabilitasaun estrada trosu Lourba bá Atsabe.
Nia haktuir katak kondisaun estrada ne’e tinan-tinan sempre afeta movimentasaun públiku, liuliu ba atividade ekonómika, kulturál no saúde.
“Ami-nia estrada ne’e, tempu udan susar la halimar. Ita la’o bá-mai, tatidik, ema oan nurak bele partu kedas, tanba dalan ne’e fatuk-laran, rai-ku’ak, foho naruk. Tanba ne’e mak ami hakarak halo lalais ona, para sente dezenvolvimentu hanesan ho sira seluk”, nia realsa.
Lembra katak, iha fulan kotuk, Ministru Obra Públika, Samuel Marçal, relata katak estrada trosu husi suku Lourba, postu administrativu Bobonaru, liga bá postu Atsabe, munisípiu Ermera, hein vistu husi Tribunál Konta hafoin selebra kontratu ho empreza Shanghai Construction Group Co.Ltd., ho distánsia kilómetru 48,93 no orsamentu millaun $43,2.
Notísia relevante: Estrada ligasaun Bobonaru-Ermera iha área Maleubu kotu totál
Jornalista: Sergio da Cruz
Editora: Maria Auxiliadora
