Parlamentu elojia esforsu Governu-Igreja ba transladasaun restu mortál preladu katóliku sira
DILI, 02 Setembru 2026 (TATOLI) – Deputada husi Bankada Kongresu Nasionál Rekonstrusaun Timorense (CNRT, sigla portugés), Cedelízia Faria dos Santos, elojia esforsu Governu no Igreja Katólika iha Timor-Leste ba transladasaun restu mortál preladu katóliku sira husi Portugál mai país ne’e.
Hanesan reprezentante povu no sarani katólika, nia dehan timoroan sente kontente simu filafali restu mortál husi preladu na’in-tolu Don Jaime Garcia Goulart, Don José Joaquim Ribeiro, no Monseñor Martinho da Costa Lopes, maski na’in-rua la’ós timoroan, maibé sira kontribui maka’as ba nasaun.
Nia agradese ba Governu Dasiak no Igreja Katólika Timor-Leste ne’ebé ho esforsu hodi lori filafali restu mortál preladu sira-nian. “Orgullu no agradese ba Maromak no matebian sira-nia tulun, prosesu hotu bele la’o”, nia hato’o iha Parlamentu Nasionál, ohin.
Cedelízia agradese mós ba sarani no entidade hotu ninia partisipasaun másima iha serimónia resesaun no atividade seluk tan ne’ebé la’o ho di’ak.
Deputada ne’e salienta katak ho transladasaun ne’e bele fó rekoñesimentu ba legadu espirituál, istóriku no nasionál. Tanba liuhusi ninia serbisu pastorál, sosiál no umanitáriu hala’o papél importante ida iha períodu importante tolu iha istória koloniál Portugés, okupasaun nian no inísiu independénsia.
Nia hatete katak ho espíritu ne’ebé sira hatudu hela sai ezemplu ba timoroan sira atu serbisu ho di’ak liután bele fó kontribuisaun iha parte ne’ebé de’it iha prosesu dezenvolvimentu país, liuliu foinsa’e sira atu nafatin kontinua kria pás no estabilidade.
Notísia relevate: https://tatoli.tl/2026/09/01/sarani-sira-presta-omenajen-ba-restu-mortal-preladu-katoliku-nain-haat-iha-tasi-tolu/
Jornalista: Nelson de Sousa
Editora: Maria Auxiliadora
