Perú anunsia hakotu relasaun diplomátika ho Iraun
DILI, 02 Setembru 2026 (TATOLI) – Governu Peruanu anunsia iha loron-tersa kona-ba hakotu relasaun diplomátika sira ho Iraun, hodi hatete katak “rejeita maka’as insitasaun Iraun nian hodi aumenta konflitu sira iha Médiu Oriente.”
“Governu Repúblika Perú nian desidi ona hakotu relasaun diplomátiku sira ho Repúblika Izlámika Iraun nian,” hatete hosi Ministériu Negósiu Estranjeiru Perú nian liuhusi nota imprensa ida.
Ministériu ne’e afirma katak desizaun ne’e bazeia ba Perú nia “kompromisu istóriku ba dame” no nia dedikasaun ba “direitu internasionál no defeza demokrasia nian.”
Perú akuza mós Iraun hodi obstrui serbisu hosi Ajénsia Internasionál Enerjia Atómika nian, hodi alega katak Teeraun nega inspetór sira asesu ba instalasaun nukleár sira iha okaziaun oioin no impede verifikasaun nesesáriu hodi impede produsaun hosi arma nukleár sira.
Nia mós espresa preokupasaun kona-ba saida maka nia deskreve hanesan restrisaun maka’as sira ne’ebé impoin hosi Iraun no interrupsaun hosi komérsiu internasionál liuhosi Estreitu Ormuz nian dezde Marsu 2026.
Perú afirma katak suspensaun ba relasaun diplomátika sira la implika separasaun hosi lasu konsular sira, ne’ebé konsidera hanesan nesesáriu hodi proteje sidadaun sira hosi nasaun ida-idak no hala’o funsaun sira seluk ne’ebé trasa iha Konvensaun Viena nian iha tinan 1963 kona-ba Relasaun Konsulár sira.
Desizaun ne’e komunika ba Iraun liuhosi nota diplomátika ida ne’ebé haruka liuhosi Embaixada Iraun nian iha Ekuadór – ne’ebé serve mós hanesan misaun Iraun nian iha Perú, informa hosi ministériu.
Notisia relevante: Iraun fó-sai ezijénsia kona-ba reabertura Estreitu Ormuz
Fonte: Xinhua
