Programa PNDS, Suku Uaimori prioriza estrada sirtu ba aldeia rua
VIKEKE, 02 Setembru 2026 (TATOLI)—Xefe Suku Uaimori, Postu Vikeke Vila, Munisípiu Vikeke, Francelino António Gomes, hateten Programa Nasionál Dezenvolvimentu Suku (PNDS) ba Suku Uamori ba tinan 2026 prioriza estrada sirtu hodi fasilita komunidade.
“Programa PNDS ba tinan ida-ne’e ami tau prioridade ba estrada sirtu kilómetru rua ho luan metru lima-resin, husi Aldeia Lulei liga bá Uaibubu atu fasilita komunidade nia movimentu tanba durante ne’e estrada husi aldeia rua ne’e kondisaun aat tebetebes. Tan ne’e, ami hakarak tau orsamentu hodi hadi’a estrada sira,” Francelino ba TATOLI iha Postu Vikeke Vila, Kuarta ne’e.
Nune’e, autoridade komunitáriu ne’e dehan, planu halo estrada sirtu ne’e sei ateru ho rai-henek, hada morru protesaun sira atu proteje rai iha tempu udan.
“Obra estrada sirtu referidu daudauk ne’e ita-nia komunidade hahú konstrui ona. Estrada sirtu ne’e distánsia kilo rua, maibé orsamentu la to’o. Nune’e, ami konstrui ba mak osan hotu, ami hein tan orsamentu adisionál ruma para kompleta,” Francelino tenik.
Nia dehan, orsamentu PNDS tinan 2026 aloka ba Suku Uaimori finansia estrada sirtu ho totál rihun $19.
Tuir dadus, populasaun Suku Uaimori totál hamutuk 1.142, totál uma-kain 242, aldeia neen kompostu husi Aldeia Lulei, Me-Uai, Uaibubo, Uatulesu, Uma Bo’O no Uma Liurai.
Jornalista: Vitorino Lopes da Costa
Editór: Xisto Freitas da Piedade
