Komandu PNTL ba krime omisídiu hasoru Terezinha: Arguidu na’in-haat kumpre prizaun preventiva tanba indisíu forte
DILI, 03 Setembru 2026 (TATOLI) – Komandu Jerál Polísia Nasionál Timor-Leste (PNTL), fó-sai katak, arguido na’in-haat ne’ebé suspeitadu oho Terezinha Cardoso kumpre prizaun preventiva tanba iha indísiu forte.
Krime omisídiu ne’e akontese iha Aldeia Wetabak, Postu Administrativu Tilomar, Munisípiu Kovalima, iha fulan Jullu tinan 2026.
Portavós Komandu Jerál Polísia Nasionál Timor-Leste (PNTL) Superintendente Xefe Polísia Joao Belo dos Reis fó-sai katak, primeiru interogatóriu la’o hela iha Suai no parte polísia mantein kontaktu ho membru sira-ne’ebé koloka iha-ne’ebá, tanba investigadór ne’ebé akompaña kazu ne’e informa katak sira na’in-haat ne’ebé DSIK detein iha loron hirak liubá, agora hetan ona desizaun husi Tribunál ba interrogatóriu dahuluk nian katak sira hotu tama prizaun preventiva.
Nia informa, suspeitu na’in-haat ne’e Tribunál aplika medida koasaun prizaun preventiva tanba iha indísiu sufisiente ba krime ne’ebé Ministériu Públiku promove ba sira.
“Iha indikasaun forte, indísiu forte ba iha envolvimentu ba iha kazu ne’e,” Joao Belo informa liuhusi konferénsia imprensa iha Kuartél Jerál PNTL Kaikoli, kinta ne’e.
Nia dehan, kazu ne’e Diresaun Servisu Investigasaun Kriminál Komandu Munisípiu Kovalima rejista ho númeru úniku kriminal (NUK) 0016/26-CVSUI no MP Suai promove krime omísidiu ba suspeitu sira.
“Sira-ne’e Ministeriu Públiku promove ho krime omisídiu, ne’ebé ha’u hateten ba maluk sira katak investigasaun sei halo nafatin. Karik iha tipu krime sira komete, investigasaun sei termina iha-ne’ebá,” nia dehan.
Nia dehan, Diresaun Servisu Investigasaun Kriminál kontinua hein delegasaun kompeténsia husi MP atu kontinua haklaken investigasaun ba kazu ne’e hodi sé de’it mak hatene, sé de’it mak iha informasaun, sé de’it mak iha koñesimentu asaun krime ida polísia bele foti nia depoimentu.
“Ami sei investiga kle’an liután hodi bele hatene paradeiru mate-isin ka moris ka mate husi ita-nia alin feto ne’ebé mak sei lakon hela,” nia tenik.
Joao Belo hateten, polísia to’o oras ne’e daudaun hetan paradeiru vítima feto ida ne’ebé suspeitadu oho husi supeitu sira iha Wetabak, Postu Administrativu Tilomar, Munisípiu Kovalima, iha fulan kotuk.
“Ha’u lakohi hakat liu desizaun Tribunál, prosesu disiplinár krime mós la’o ona desizaun mak bele termina membru PNTL ne’ebé mak envolve iha asaun ida-ne’e,” nia dehan.
Joao Belo mós lakohi temi suspeitu sira ne’e husi instituisaun ne’ebé tanba konsidera katak suspeitu sira-nia asaun ne’e nu’udar asaun individu, tanba kuandu individu sira mak halo ne’ebé lori naran individu la’ós instituisaun ne’ebé individu responsabiliza tuir individu nia hahalok.
“Ita labele jeneraliza asaun individu ida ba instituisaun seluk,” nia dehan.
Notísia relevante: TJPIS aplika prizaun preventiva ba arguidu na’in-haat suspeitadu komete omisídiu
Jornalista : Natalino Costa
Editór: Evaristo Soares Martins
