TJPIS aplika prizaun preventiva ba arguidu na’in-haat suspeitadu komete omisídiu
KOVALIMA, 03 Setembru 2026 (TATOLI) –Tribunál Judisiál Primeira Instánsia Suai (TJPIS), liuhusi despaixu ba prosesu primeiru interrogatoriu, deside aplika medida Prizaun Preventiva ba arguidu nain-haat ne’ebe suspeitadu halakon Terezinha Cardoso nia vida iha Aldeia Wetaba, Postu Adminsitrativu Tilomar, Munisípiu Kovalima.
Arguidu sira lori mai tribunál no Ministériu Publiku (MP) ne’ebé reprezenta prokuradór Renato Bere Nahac promove arguidu sira ho krime Omisídiu Simples previstu tuir artigu 138.o husi Kodigu Penál Timor-Leste (KPTL).
Iha prosesu julgamentu Rona tiha arguidu sira, iha despaixu Tribunál nian liuhusi juiz estajiadu Sipriano, deside aplika medida Prizaun Preventiva ba arguidu na’in-haat ho inisiál , DC, JC ho AMA
Molok ne’e iha alegasaun Ministériu Públiku reprezenta Prokuradór, Renato Bere Nahac husu Tribunál aplika medida koasaun Prizaun Preventiva ba arguidu na’in-haat.
No, parte Defeza la aseita alegasaun Ministériu Públiku nian, ne’ebé husu Tribunál atu aplika medida Termu Identidade Rezidensia (TIR) hodi hein investigasaun.
Prosesu ne’e prezide husi juíz estajiadu Sipriano, Ministériu Públiku reprezenta husi prokuradór Renato Bere Nahac arguidu sira hetan asistente legál husi Defensór Públiku Domingos dos Dantos.
Notísia relevante:MP husu aplika medida koasaun Prizaun preventiva ba arguidu na’in-haat
Fó hanoin fali katak, Polísia Sientífika no Investigasaun Kriminál (PCIC) – Departamentu Servisu Investigasaun Kriminál (DSIC), bazeia ba mandadu Tribunál, halo kaptura no detensaun ba arguidu na’in-haat ne’e. DSIC no PNTL Kovalima detein arguidu na’in-tolu ne’ebé alegadamente membru SNI, no arguidu ida membru Unidade Patrulhamentu Fronteira (UPF), iha sela polísia nian durante oras 72, hodi aprezenta sira ba primeiru interogatóriu iha TJPIS Suai, tanba iha indísiu forte.
Ho nune’e, bazeia ba desizaun Tribunál, arguidu na’in-haat ne’e aplika medida prizaun preventiva, ne’ebé desizaun ne’e sai iha loron 3 Setembru 2026.
Arguidu na’in-haat ne’e kaptura iha loron 31 Agostu 2026 no detein iha sela Polísia Komandu PNTL Munisípiu Kovalima durante oras 72, bazeia ba Prosesu Nú. 0016/26CVSUI.
Jornalista :Celestina Teles
Editór: Rafael Ximenes de A. Belo
