Parlamentu konsidera literasia dijitál importante hodi integra iha kurríkulu eskolár
DILI, 03 Setembru 2026 (TATOLI) – Vise-Prezidente Parlamentu Nasionál, Alexandrino Afonso Nunes, dehan literasia dijitál importante tebes ba Ministériu Edukasaun atu integra iha kurríkulu eskolár hodi hanorin estudante.
Nia hato’o kestaun ne’e relasiona ho rekomendasaun husi Parlamentu Foinsa’e Edisaun Dalimak 2026, ne’ebé husu atu implementa Programa Edukasaun Mediátika no Literásia Dijitál iha eskola sira, liuliu integra iha kurríkulu eskola nia. Medida ne’e ho objetivu atu promove entre joven utilizasaun seguru responsavel no konxiente forma dijitál.
Aleinde protesaun privasidade no dadus pesoál no prevensaun cyber bulling ho diskursu ódiu no dezinformasaun.
Deputadu dehan, ida-ne’e importante liuhusi eskola sira atu iha ona koñesimentu ba utilizasaun plataforma dijitál ho loloos no responsabilidade, tanba iha mós risku sira ne’ebé ohin loron sai mós preokupasaun.
“Ida-ne’e ita apoia atu sai iha kurríkulu iha eskola sira”, nia hatete ba Tatoli iha Parlamentu Nasionál, ohin.
Parlamentu sei envia rekomendasaun sira husi Parlamentu Foinsa’e ni’an ba parte Governu, liuhusi ministériu kompetente atu toma atensaun. “Sei hato’o mós ba bankada parlamentár sira atu iha koñesimentu no tau iha prioridade, bainhira iha lejizlasaun tuirmai”, nia dehan.
Governu submete ona proposta lei ba Parlamentu ne’ebé husu autorizasaun lejizlativa hodi aprova pakote lejizlativu integradu ida kona-ba siberseguransa, ne’ebé kobre krime no prosesu kriminál sira iha ámbitu dijitál no definisaun rejime jurídiku siberespasu nasionál.
“Ne’e ko’alia kona-ba sibernétika, siberseguransa, importante iha ligasaun, ami sei tau prioridade diskute”, nia realsa.
Notísia relevante: Parlamentu Foinsa’e rekomenda medida sanulu, fó énfaze ba kampaña nasionál kona-ba seguransa dijitál
Jornalista: Nelson de Sousa
Editora: Maria Auxiliadora
