PNTL desmantela tan rede ba kazu scaming no detein suspeitu na’in-neen iha Kolmera
DILI, 03 Setembru 2026 (TATOLI) – Portavós Komandu Jerál Polísia Nasionál Timor-Leste (PNTL), Superintendente Xefe Polísia Joao Belo dos Reis, hateten, ekipa konjunta kompostu husi Diresaun Investigasaun Kriminál hamutuk Servisu Informasaun Polísia iha kuarta (02/9) kalan desmantela tán rede krime transnasionál scam call center iha área Kolmera.
Operasaun ne’ebé ekipa konjuta halo ne’e iha kuarta (02/9) kalan porvolta 19:00 kalan susesu asegura no detein ho fraglante delitu suspeitu ne’ebé suspetadu ba prátika krime scaming call center hamutuk na’in-neen iha área Kolmera.
“Hanesan maluk sira akompaña horikalan porvolta oras tuku hitu Polísia Nasionál Timor-Leste husi ekipa konjunta entre investigasaun kriminál ho servisu informsaun halo operasaun fraglante delitu iha área Kolmera ba suspeita kazu scaming call center nian no konsege deteta katak operasaun la’o hela atividade husi grupu krime organizadu ne’e, ne’ebé ita halo fraglate delitu, ita detein sidadaun estranjeiru na’in-neen,” Joao Belo informa liuhusi konferénsia imprensa, iha Kuartél Jerál PNTL, Kaikoli, kinta ne’e.
Nia dehan, ekipa konsege foti evidénsia sira mak hanesan; laptop hitu, komputadór lima, telefone hamutuk -11, starlink rua, reuter ida, tablet ida, karreta ida no pasaporte hitu.
“Depoizde halo tiha identifikasaun Polísia Nasionál Timor -Leste lori kedas suspeitu mai iha Kuartél Jerál hodi halo identifikasaun. Depois halo identifikasaun detein sira iha sela detensaun Komandu Munisípiu Dili nian,” nia dehan.
Belo relata katak, husi suspeitu na’in-neen ne’e, iha suspeitu na’in-rua mak antes ne’e Tribunál aplika ona medida, maibé horikalan suspeitu na’in-rua kontinua halo asaun ne’e.
“Ho nune’e polísia kontnua halo prosesu normál ba sira. Kazu ne’e rasik DSIK rejista ona ho númeru NUK 0337/26.PNSIK,” nia informa.
Portavós PNTL ne’e apela nafatin ba sidadaun sira matan moris no servisu hamutuk nafatin ho polísia Nasionál Timor-Leste, nune’e kombate lalais krime internasionál krime organizadu.
Nia subliña, suspeitu na’in rua hamutuk ho suspeitu na’in-haat seluk horikalan kaptura iha área ne’ebé hanesan (Kolmera) no oras ne’e detein ona iha sela komandu PNTL Munisípiu Dili.
“Ita nafatin konsulta ho Ministériu Públiku hodi halo prosesu normál ba sira,” nia dehan.
Joao Belo hateten, momentu halo operasaun detein suspeitu na’in-neen no rekolla pasaporte hitu, tanba ne’e PNTL sei halo investigasaun ba pasaporte ida.
“Bainhira ita halo intervensaun Forénsiku identifika katak husi na’in-neen ne’ebé mak kaptura detein iha fatin ne’ebá iha pasaporte hitu, ne’ebé prosesu identifikasaun ba ida ne’ebé mak iha liman mak ita sei halo,” nia tenik.
Notisia relevante: Tribunál aplika medida haat ba arguidu na’in-32 ba kazu scam call center iha City8
Jornalista: Natalino Costa
Editór: Evaristo Soares Martins
