SMS Bobonaru klarifika kazu família hulan inan isin-rua bá Postu Saúde Leber
BOBONARU, 03 Setembru 2026 (TATOLI) – Diretór Servisu Munisipál Saúde (SMS) Bobonaru, Cesaltino Maia, klarifika katak família hulan inan-isin rua husi aldeia Mabelis, bá Postu Saúde Leber, depoizde ambulánsia la konsege tula pasiente diretamante bá postu saúde tanba ambulánsia ne’e, iha tempu ne’ebá, transporta hela pasiente seluk bá Ospitál Referénsia Maliana.
Cesaltino hatete katak, semana ida antes partu, pesoál saúde liuhusi Programa Klínika Móvel iha aldeia Mabelis, informa ona pasiente Francisca Moniz (42) atu bá Postu Saúde Leber tuir loron ne’ebé determina ba konsulta no preparasaun ba partu, maibé iha momentu ne’ebá pasiente la konsege bá konsulta.
Nia esplika katak, bainhira família kontaktu pesoál saúde atu husu ambulánsia, karreta iha tempu ne’ebá transporta hela pasiente bá Maliana no sei filafalu husi ne’ebá mak bele lua inan isin-rua ba unidade saúde.
“Enfermeira hein duni to’o lokoraik, maibé [pasiente] la bá ida. Liu tiha loron rua [enfermeira telefone nafatin bin [inan isin-rua] sa’e mai ona ka la’e. Se lakohi mai postu entaun bá liu Maliana. Liu tiha iha loron 11, tuir informasaun inan isin-rua ne’e moras iha tku 06:0h0 dadeer, loron tomak la fó hatene, nein telefone. To’o fali tuku 0h:30 lokoraik, sira telefone ba enfermeira atu lori ambulánsia bá tula tanba atu partu. Enfermeira hatán katak agora ambulánsia sei lori pasiente bá Maliana, husi Maliana sai mai mak haruka bá”, nia relata ba jornalista sira, iha salaun Maria Tapó, ohin.
Diretor ne’e mós hatete katak, iha tempu ne’ebá, Xefe Sentru Saúde Bobonaru orienta kedas ambulánsia atu bá tula pasiente referida. Karreta konsege to’o Leber, maibé família deside deside hulan pasiente bá Postu Saúde Leber.
Iha postu saúde ne’e, pesoál saúde konsege halo atendimentu no ajuda inan ne’e partu ho kondisaun normál. Maibé, depoizde partu, pasiente nia tensaun sa’e no pesoál saúde kontinua monitoriza nia kondisaun.
“Pesoál saúde hein to’o fali tuku 10 kalan ho ambulánsia, haree nia kondisaun ain bubu, tensaun sa’et, sira telefone doutór iha Bobonaru no lori fali bá Sentru Saúde Bobonaru. Iha ne’ebá, sira atende durante loron ida, más tensaun la tun. Doutór sira foti desizaun transfere fali mai Maliana. Depois, nia kondisaun di’ak, normál”, nia dehan.
Antigu Xefe Sentru Saúde Bobonaru ne’e esklarese katak ambulánsia la tula pasiente ne’e iha nia rezidénsia iha Mabelis tanba kazu partu ne’e la’ós emerjensia iha momentu ne’ebá.
“Partu ne’e planeadu, hanesan ohin ha’u hatete antes semana ida atu partu enfermeiru sira tun bá baze fó hatene inan-feton ne’e atu bá iha postu saúde. Ami hatene sá loron ho sá fulan atu partu. Tanba ne’e, informasaun dehan sira telefone ambulansia la bá sira aumenta de’it. Ami sempre atende hela de’it, ami iha kada postu iha oráriu fiksu”, nia afirma.
Notísia relevante: MOP promete rezolve kondisaun estrada iha suku Leber
Enkuantu, informasaun espalla katak Postu Saúde Laber laiha ekipamentu, dirijente ne’e dehan la loos, tanba postu saúde ekipamentu sufisiente atu fó atendimentu ba komunidade.
Nia mós apela ba públiku atu verifika uluk informasaun antes fahe ka halo publikasaun iha rede sosiál, liuliu kona-ba servisu saúde, atu evita informasaun sala ne’ebé bele hamosu preokupasaun iha komunidade.
Notísia relevante: Saúde Bobonaro prepara ambulánsia rezerva rua atende CHC hitu
Jornalista: Sergio da Cruz
Editora: Maria Auxiliadora
