iklan

BOBONARO, COVID-19, HEADLINE, MUNISÍPIU, SAÚDE

Saúde Bobonaro prepara ambulánsia rezerva rua atende CHC hitu

Saúde Bobonaro prepara ambulánsia rezerva rua atende CHC hitu

Pesoál-sira hosi Diresaun Nasionál Ambulánsia distribui ambulánsia foun ba Munisípiu. Imajen Tatoli/Felicidade Ximenes.

BOBONARO, 13 janeiru 2023 (TATOLI) – Diresaun servisu saúde munisipál Bobonaro prepara hela ambulánsia multifunsaun unidade rua hodi substitui ambulánsia Sentru Ijiene Komunitária (CHC, sigla portugés) hitu bainhira ambulánsia hosi sentru hirak-ne’e avaria.

Servisu saúde Bobomaro hola inisiativa ba CHC hitu iha postu administrativu lima nune’e halo atendimentu emerjénsia ba pasiente sira.

Diretór servisu saúde munisipál Bobonaro, João Baptista Cardoso, haktuir iha tinan 2019 ministériu saúde entrega ambulánsia multifunsaun ida ba CHC Bobonaro, daudaun ne’e sei foun hela, maibé karreta sira-ne’ebé governu distribui antes ne’e ninia kondisaun ladún di’ak, tuan ona sempre avaria tanba halo operasaun ba mai durante tempu naruk ona.

Notísia relevante: MS planu sosa ambulánsia multifunsaun unidade 18 iha 2023

“Ami iha karreta rua rezerva iha servisu munisipál, ida ambulánsia Covid-19 nian. kuandu sentru saúde ruma ninia ambulánsia avaria, ami dada mai hodi mekániku sira haree, depois subtitui fali karreta rezerva ne’ebé ami para hela,” nia ko’alia iha suku Tapo-Memo, postu administrativu Maliana, kinta ne’e.

Responsável servisu saúde munisipál ne’e akresenta, relasiona ho karreta balu ho kondisaun la estável, difikulta tebes motorista sira atu halo tranferénsia pasiente hosi CHC ba Hospital Referál Maliana.

Tanba ambulánsia hirak-ne’ebé halo operasaun maioria multifunsaun signifika bele uza ba atividade klínika movél kona-bá programa Servisu Integradu Saúde Komunitária (SISKA), vasinasaun no atividade promosaun saúde ne’ebé implementa iha suku laran.

“Dalaruma mak pasiente bolu ambulánsia tabrakan ho atividade iha terrenu, ami tenke esforsu maka’as liután oinsá motorista sira bele halai hosi fatin atividade ba fali fatin tula pasiente hodi halo transferénsia, ne’e mak dalaruma halo tranferénsia tarde,” nia katak.

Nia fó ezemplu, iha Maliana, ambulánsia ne’e ba halo atividade ne’e iha Saburai, moras ne’e iha Mole-Anan ne’ebá entaun fatin ne’e dook malu, emerjénsia ruma molok ambulánsia ba ne’e han tempu oituan, entaun sai preokupasaun.

Kona-bá transferénsia pasiente hosi Hospitál Referál Maliana ba Hospitál Nasionál Guido Valadares (HNGV), Bidau, Dili laiha problema tanba bainhira iha kazu emerjénsia ruma mak karreta avaria ka la sufisiente sempre hetan apoiu hosi Servisu Nasionál Ambulánsia no Emerjénsia Médiku (SNAEM,I.P).

Notísia relevante: MS presiza aumenta motorista ambulánsia iha CHC Cailaco

Jornalista   : Sérgio da Cruz

Editór         : Evaristo Soares Martins

iklan
iklan

Leave a Reply

iklan
error: Content is protected !!