Venezuela asina akordu enerjétiku ho empreza Eni no Chevron
DILI, 03 Setembru 2026 (TATOLI) – Prezidente Interinu Venezuela nian, Delcy Rodríguez, asina ona akordu no kontratu komersiál sira iha loron-kuarta ne’e ho empreza multinasionál italianu Eni no Chevron, ho sede iha Estadu Unidu Amérika (EUA).
Eni S.p.A. nu’udar empreza multinasionál ida ba mina no gás ho sede iha Roma. Konsidera hanesan empreza ida hosi empreza petrolífera “boot” hitu iha mundu, Eni hala’o operasaun iha nasaun 66.
Chevron Corporation maka empreza enerjia multinasionál Amerikanu ida ne’ebé espesializa liuliu iha mina no gás. Desendente diretu daruak boot liu hosi Standard Oil, no orijinalmente koñesidu hanesan Standard Oil Company hosi California, ida-ne’e ativu iha nasaun liu 180.
Akordu sira ho Chevron inklui habelar operasaun sira ba área foun sira esplorasaun petróleu nian. Inisiativa sira-ne’e apoia planu sira empreza konjunta nian hodi investe liu dolar amerikanu billaun hitu iha Venezuela iha tinan lima oinmai, liu duplika produsaun ba maizumenus barríl 600,000 kada loron, hatete hosi empreza liuhusi nota imprensa.
Operasaun foun mina no gás inklui iha akordu sira ho Eni; CEO empreza nian, Claudio Descalzi, destaka katak akordu ne’e “marka marku ida iha lansamentu faze istóriku foun ida kreximentu nian no konfiansa foun iha futuru enerjétiku Venezuela nian.”
Iha parte Venezuela nian, akordu no kontratu sira asina hosi empreza petrolífera estatál Petróleos de Venezuela S.A., Korporasaun Nasionál Elétrika, no Ministériu Idrokarbonetu sira.
Kona-ba kalendáriu implementasaun ho Eni, parte sira konkorda atu aprezenta planu dezenvolvimentu formál durante fulan-Outubru, ho objetivu atu lansa faze operasionál dahuluk iha fulan-Dezembru.
Serimónia asinatura nian hala’o durante vizita hosi Sekretáriu Enerjia Estadus Unidus nian Chris Wright, ne’ebé to’o iha Caracas iha loron-tersa ne’e.
Iha loron 3 fulan-Janeiru, forsa militár norte-amerikanu sira lansa atake ho eskala boot hasoru Venezuela no detein ho forsa Prezidente Venezuela Nicolás Maduro ho nia espoza molok transporta ba Novaiorke.
Iha loron 29 Janeiru, Rodriguez anunsia aprovasaun ba reforma parsiál ida ba lei idrokarbonetu nasaun nian hodi permite partisipasaun boot hosi setór privadu iha indústria petrolífera. Venezuela kaer rezerva petróleu ne’ebé provadu boot liu iha mundu.
Notisia relevante: Venezuela anunsia akordu petrolíferu ho EUA vigora durante tinan 25
Fonte: Xinhua
