AMRT no Projetu CAFE realiza atividade edukativa “Duas Margens, Um Projeto” ba Estudante sira
DILI, 04 Setembru 2026 (TATOLI) – Arkivu no Muzeu Rezistensia Timorense (AMRT, I.P.) hamutuk ho Projetu CAFE realiza atividade edukativa ho tema “Duas Margens, Um Projeto” ba estudante 5.º anu husi CAFE Díli no CAFE Ataúro, iha sexta-feira ne’e, iha edifísiu AMRT, Dili.
Reprezentante Diretora Eskola CAFE Díli no Ataúro, Maria da Luz Rocha, hateten atividade ne’e integra programa “Diliuro 2026” ho objetivu atu fó oportunidade ba labarik sira atu aprende no deskobre koñesimentu foun, dezenvolve kreatividade, no hametin relasaun entre estudante sira husi fatin rua ne’ebé diferente.
Maria hateten durante atividade ne’e estudante sira fahe ba grupu oioin no partisipa iha espasu temátiku sira ne’ebé prepara ona hosi organizadór sira.
“Programa ne’e inklui aprezentasaun filme badak sira ho quiz edukativu, atividade iha Espasu Matemátika iha Asaun ne’ebé kompostu husi jogu, dezafiu no konstrusaun sira, no mós Espasu Siénsia Prátika, ne’ebé estudante sira bele halo esperiénsia sientífika simples, observasaun orientada no demonstrasaun prátika sira,” Maria jaktuir.
Nia akresenta katak momentu importante ida iha atividade ne’e mak elaborasaun koletiva kona-ba tema “A Consulta Popular”, ne’ebé konvida estudante sira atu reflete no espresa sira nia hanoin kona-ba Konsulta Popular hanesan akontesimentu iistóriku importante ida iha Timor-Leste.
Atividade ne’e remata ho momentu dansa no konvíviu entre partisipante sira.
Iha oportunidade hanesan, Prezidente AMRT, Jorge Alves “We Moris”, hateten katak prezervasaun memória Rezisténsia Timoroan la’ós de’it kona-ba guarda dokumentu, objetu no testemuñu sira husi tempu uluk, maibé importante tebés atu aproxima memória istórika ba jerasaun foun sira.
“Labarik no joven sira presiza komprende istória nasaun, reflete kona-ba signifikadu liberdade no valor partisipasaun, dame no konstrusaun koletiva ba sosiedade Timoroan,” dehan We Moris.
Nia mós salienta katak parséiria entre AMRT no Projetu CAFE hatudu importánsia kooperasaun entre instituisaun edukativa no kulturál sira, atu patrimóniu no memória iistórika bele sai instrumentu importante ba edukasaun.
Partisipasaun estudante hamutuk 148 kompostu husi husi eskola CAFE Díli na’in 120 no estudante husi CAFE Ataúro na’in 28 fó signifikadu espesiál ba lema “Duas Margens, Um Projeto”, ne’ebé buka aproxima komunidade sira, kria ponte liuhusi edukasaun no fó oportunidade ba labarik sira atu aprende no deskobre koñesimentu hamutuk.
AMRT reafirma nia kompromisu atu kontinua loke nia odamatan ba eskola no jerasaun foun sira iha Timor-Leste, tanba fiar katak liuhusi joven sira mak memória no istória nasaun bele kontinua moris no sai baze ba kompriensaun prezente no konstrusaun futuru.
“Hatene istória mak lori ba komprende valor liberdade ne’ebé hetan ona no simu responsabilidade atu prezerva ba jerasaun sira tuir mai,” konklui We Moris.
Jornalista: Camilio de Sousa
Editór: Filomeno Martins
