Top

APC husu komunidade labele fiar informasaun “hoax” atu akontese rai nakdoko iha TL

Prezidente Autoridade Protesaun Sivíl (APC), Jesuino dos Reis Matos Carvalho, hamutuk ho ekipa realiza konferénsia imprensa hodi fó hanoin ba públiku atu hadook-an husi fatin risku dezastre naturál. Imajen Tatoli/Alexandra da Costa.

DILI, 04 Setembru 2026 (TATOLI)—Autoridade Protesaun Sivíl (APC) husu komunidade hodi fó atensaun nafatin ba komunidade sira atu hadook-an husi risku no labele fiar informasaun falsa (hoax) ne’ebé la públika husi fontes kredivel sira liuliu kona-ba posibilidade atu akontese rai nakdoko iha Timor-Leste.

Prezidente Autoridade Protesaun Sivíl (APC), Jesuino dos Reis Matos Carvalho, hateten bazeia ba informasaun balun ne’ebé públika iha mídia sosiál kona-ba posibilidade atu akontese rai nakdoko iha Timor-Leste, ne’e la’ós husi fontes kredivel entaun asuntu ida-ne’e só fonte kredivel mak bele fó sai hanesan IGTL no DNMG.

“Husi APC ami nafatin update hela informasaun husi DNMG no parséria sira husi nasaun seluk. Karik informasaun ne’e iha dunia, entaun ami bele fó sai, maibé atu dehan de’it katak risku ne’e sempre iha. Tanba ne’e, programa mitigasaun prevensaun sira kontinua hala’o hodi fó avizu ba komunidade atu hadook-an husi risku,” Pezidente APC ne’e relata iha konferénsia imprensa ne’ebé hala’o iha edifísiu APC, Kaikoli, ohin.

Prezidente Jesuino dehan, atu deteta akontesimentu rai-nakdoko ne’ebé ho magnitude aas iha timor ne’e seidauk loos tanba seidauk iha fonte kredivel ida mak fó sai kona-ba akontesimentu ne’e no iha oras saida.Loloos iha duni informasaun risku sira ba rai-nakdoko ne’e, maibé ne’e akontese de’it iha área NTT.

“Timor iha duni ninia plaka ne’ebé bele akontese rai-nakdoko maibé barak liu afeta husi vulkaun Indonézia nian ne’ebé mak nakfera (rabenta). Tanba ne’e mak afeta mós to’o ita, hanesan akontesimentu rai-nakdoko foin dadauk iha Beasu ne’e mós afeta husi plaka Indonézia nian,”  nia afirma.

DNMG mós apela ona informasaun falsa ida-ne’e ba públiku ho sira-nia argumentu ne’ebé loloos. Tanba ne’e husu ba komunidade labele pániku, bainhira hetan informasaun falsa sira iha mídia sosiál presiza konfirma mós ba parte relevante sira.

“Husu komunidade nafatin atensaun ba risku dezastre sira liuliu agora anin ho intensidade boot. Entaun, ita labele sunu rai arbiru, labele hela iha ai-okos. Dalabarak ami hakarak apoiu pedidu husi komunidade atu tesi ai, maibé ami-nia ekipamentu mak la sufisiente,” nia hateten.

Aleinde ne’e mós, nia apela ba komunidade ne’ebé hela besik tasi ibun, bainhira hatene ona informasaun ruma kona-ba rai-nakdoko sempre fó impaktu ba laloran (ondas tasi nian) sempre iha, karik akontese “tsunami” mós iha sirene ne’ebé sei bele fó ajuda TL.

Jornalista : Alexandra da Costa

Editór        : Cancio Ximenes

Publisidade

Leave a Reply

Latest Post

error: Content is protected !!