Autoridade Kovalima apoia nesesidade bázika ba komemorasaun Trajédia 7 Setembru
KOVALIMA, 04 Setembru 2026 (TATOLI)- Autoridade Munisípiu Kovalima liuhusi Servisu Munisipál Protesaun Sívil no Jestaun Risku Dezastre Naturál, fó apoiu nesesidade bázika ba Komisaun Organizadora Komemorasaun Trajédia 7 Setembru iha Suku Lour, Postu Administrativu Zumalai, Munisípiu Kovalima.
Diretór Servisu Munisipál Protesaun Sívil no Jestaun Risku Dezastre Naturál, João Martins, hateten katak apoiu ne’e bazeia ba despaxu husi Presidente Autoridade Munisípiu Kovalima atu responde ba pedidu Komisaun Organizadora Komemorasaun Trajédia 7 Setembru.
“Ita hetan despaxu husi ita-nia Prezidente Autoridade Munisípiu atu fó apoiu ba ita-nia Komisaun Organizadora ba komemorasaun Trajédia 7 Setembru ne’ebé akontese iha Suku Lour, Postu Administrativu Zumalai, Munisípiu Kovalima,” Diretór João Martins relata ba jornalista sira iha Zumalai, ohin.
Nesesidade bázika ne’ebé Autoridade Munisípiu Kovalima fó inklui foos marka Hadomi, kada saku ho todan kilograma 25, hamutuk saku sanolu (10), supermie kaixa sanolu (10), mina te’in kaixa sanolu (10), no lona lima.
João Martins hateten katak apoiu ne’e ho objetivu atu haforsa Komisaun Organizadora, nune’e bele hala’o atividade komemorasaun Trajédia 7 Setembru 1999 ho di’ak.
Notísia relevante:Husi trajédia 1999 ba unidade: Zumalai promove dame liuhusi desportu komunitáriu
Iha sorin seluk, Xefe Komisaun Organizadora, Denis Barreto dos Santos, hato’o agradese ba Autoridade Munisípiu Kovalima tanba konsidera no responde ba proposta ne’ebé komisaun submete ba.
Nia hateten katak apoiu ne’e importante atu responde ba nesesidade konsumasaun komunidade nian durante atividade komemorasaun ne’ebé sei hala’o durante loron rua iha Suku Lour.
“Ami orgullu tanba Autoridade Munisípiu bele responde ba ami-nia pedidu ne’ebé ami dirije ba Presidente Autoridade Munisípiu. Hafoin, Presidente hatun despaxu hodi fó apoiu nesesidade bázika ba ami,” nia dehan.
Notísia relevante:Sobrevivente Setembru Negro Presiza Estadu Nia Apoiu
Jornalista: Celestina Teles
Editór:Rafael Ximenes de A. Belo
