Husi trajédia 1999 ba unidade: Zumalai promove dame liuhusi desportu komunitáriu
KOVALIMA, 01 Setembru 2026 (TATOLI) – Iha ámbitu komemorasaun trajédia 7 Setembru 1999, komunidade iha Suku Lour, Postu Administrativu Zumalai, Munisípiu Kovalima, hamutuk hodi transforma memória pasada nian sai meiu ida hodi promovu dame, unidade, no amizade liuhusi atividade desportiva komunitária.
Iha abertura eventu desportivu ne’e, Reprezentante Administradór Postu Administrativu Zumalai, Armando da Silva, hato’o apelu forte ba jogadór sira hotu atu hatudu disiplina aas no hatudu prinsípiu dame nian durante kompetisaun la’o. Nia subliña katak jogu ne’e sai nu’udar meiu ida hodi hametin uniaun entre sidadaun sira.
“Kompetisaun ne’e atu enkoraja ita hotu atu hametin unidade no labele lori diferensa partidária, etnia ka sukuismu. Ita presiza unidade atu atividade desportiva bele kontinua realiza iha tinan sira oin mai,” Reprezentante Administradór Postu Administrativu Zumalai Armando da Silva hateten.
Nia mós husu ba jogadór sira atu rona orientasaun husi koordenadór desportivu no komisaun organizadora, hodi evita konflitu durante kompetisaun.
“Bainhira realiza atividade desportiva, ita presiza rona mós koordenadór desportivu sira, atu labele hamosu konflitu. Ita tenke halo desportu ho amizade no labele de’it hanoin kona-ba manan ka lakon,” nia hateten.
Notísia relevante:Suai-oan hanoin hikas Masakre Setembru Negro 1999 ho prosisaun
Iha sorin seluk, Prezidente Komisaun Organizadora, Denis Barreto dos Santos, hateten katak komisaun rejista klubu feto na’in-11 no klubu mane na’in-hitu atu partisipa iha kompetisaun desportiva nivel suku ne’e.
Nia esplika katak atividade ne’e realiza ho objetivu atu komemora trajédia 7 Setembru 1999 no komisaun organiza ona preparasaun atu hala’o kompetisaun durante semana ida, iha dadeer no lorokraik.
“Realiza atividade desportu nível suku ho objetivu mak atu komemora trajédia 7 Setembru 1999. Tanba ne’e, komisaun organizadór halo preparasaun atu atividade desportiva ne’e hala’o durante semana ida, iha dadeer no lorokraik,” nia esplika.
Denis Barreto dos Santos mós husu ba jogadór sira atu respeita regra kompetisaun no hatudu disiplina iha kampu laran, tanba objetivu prinsipál la’ós de’it atu hetan prémiu, maibé atu promove amizade no unidade entre komunidade.
“Jogadór sira tenke tuir regra, labele hanoin de’it atu manan ka hetan prémio, maibé tenke hatudu disiplina iha kampu laran, hodi kompetisaun bele la’o ho di’ak no ho amizade,” nia hateten.
Komemorasaun trajédia 7 Setembru 1999 iha Zumalai hetan apoiu osan husi Muzeu Memoriál Kovalima ho montante US$2.000, no mós kontribuisaun husi veteranu no komunidade sira. Osan ne’e la’ós uza de’it ba atividade desportiva, maibé mós atu apoia atividade komemorasaun sira seluk.
Komisaun organizadora hetan konfiansa husi komunidade no veteranu sira atu organiza programa komemorasaun ne’e. Komisaun ne’e hala’o ona nia servisu durante tina0-tolu, hahú husi 2023.
Tuir programa, atividade komemorasaun sei hala’o husi loron 06 to’o loron 07 Setembru, ho atividade oioin. Iha loron ba dahuluk , hala’o atividade hodi hahú ho abertura kompetisaun vóleibol feto no mane. Depois, sei konvida autoridade munisípiu atu halo abertura ofisiál.
Tuirmai, sei realiza audénsia ho sasin no sobrevivente sira atu rona istória no esperiénsia sira kona-ba eventu 7 Setembru 1999.
Iha lorokraik, komunidade sei hala’o la’o obor husi Zumalai Vila to’o Sede Suku Lour. Iha kalan, sei realiza reza hamutuk, reflesaun no atividade divertimentu ba komunidade.
Notísia relevante:PR Horta tau ai-funan no lilin iha monumentu Masakre Setembro Negro 1999
Jornalista:Celestina Teles
Editór: Rafael Ximenes de A. Belo
