Edukasaun Oekusi hasai desizaun ho pontu 17 ba ensinu hotu atu kumpre
OEKUSI, 04 Agostu 2026 (TATOLI) – Diresaun Servisu Rejionál Edukasaun, Rejiaun Administrativa Espesiál Oekusi Ambeno (RAEOA), sesta ohin, hasai sirkulár ofisiál ba funsionáriu edukasaun inklui eskola nível hothotu atu kumpre.
Sirkulár ofisiál ne’ebé Ajénsia TATOLI,I.P asesu ho númeru referénsia-SRE/RAEOA-TL/IX/2026 hato’o ba, dirijente eskola sira nível ensinu hothotu no ajenti Gabinete Apoia Téknika (GAT) no funsionáriu edukasaun ho klasifikasaun importante atu kumpre.
“Liuhusi meiu ida-ne’e, nu’udar Diretór Servisu Rejionál Edukasaun ho hakraik-an hato’o ka sirkulár orientasaun hodi ita-hotu kumpre ba funsionamentu institusionál ba pontu 17,” sita iha sirkulár ofisiál ne’ebé Ajénsia TATOLI,I.P asesu, ohin, no asina direita husi Diretór Servisu Rejionál Edukasaun, Vincêncio Cono.
Notísia relevante:Edukasaun Oekusi hasai sirkulár bandu totál ‘fuma’ iha arredór eskola
Pontu 17 ne’ebé parte Diresaun Servisu Rejionál Edukasaun Oekusi fó sai maka hanesan:
- Pontualidade mak leál ba Estadu, evita tama tarde sai sedu, promove “sentimento de pertença a nossa profissão e a pátria”.
- Dirijente eskola labele zero oras, se Zero oras presiza justifika planu servisu iha eskola.
- Dirijente eskola sira promove no kria pikete kada loron.
- Loron sábadu promove grupu traballu professór, aula de reforço e aula de recuperação.
- Respeita kaléndáriu eskolar (enkontru no distribui kaderneta ho loron sábadu).
- Dirijente eskola sira presiza revista no haree planu lisaun sira kada manorin hodi garante preparasaun aula.
- Dirijente eskola sira promove no apresia kreatividade komunidade edukativa.
- Dirijente eskola sira atividade kulminante edukasaun nian mak ensinu-aprendijazén (teória no prátika).
- Dirijente eskola sira hadi’a jardin eskola sira.
- Dirijente eskola presiza priénxe oras auzénsia profesór nian.
- Funsionáriu Gabinete Apoiu Tékniku (GAT) ba administrasaun sira hadi’a korrespondénsia no konektividade.
- Ita hotu “evita” trata asuntu privadu ho oras servisu (liliu dirijente eskola sira tenke ezemplár).
- Manorin nívél ensinu hothotu tuir kurríkulu ensinu laiha “part time” ka hanorin tuir oras de’it fila ona.
- Obrigatoriamente pedidu lisensa tenke eskrita kada funsionáriu, kada fulan permite lisensa loron tolu de’it, ezetu: lia mate/moras/asidente mak bele liu loron husi loron tolu.
“Pedidu lisensa obrigatoriamente tenke la’o tuir ierarkia dirijente instituisaun, funsionáriu ka profesór labele husu liesensa diretamente ba Diretór Rejionál edukasaun, sein koñesimentu dirijente eskola e departamentu. Pedidu lisensa ba deslokasaun munisípiu seluk ka diaspora, diretamente ba Diretór Rejionál Edukasaun ho koñesimentu dirijente eskola no departamentu,” sita iha sirkulár ne’e.
- Hadi’a linguajén administrasaun no burukrasia korespondénsia.
- Presiza kontribuisaun ruma husi estudante no inan-aman obrigatoriamente enkontru no akta konkordánsia.
- Guarda eskola sira, labele abandona servisu seguransa eskolár iha áredór eskola, kuida edifísiu públiku sira husi estragu, hadi’a jardín eskola no bele halo to’os eskolár ho profesór inklui estudante sira.
Jornalista: Abílio Elo Nini
Editór: Rafael Ximenes de A. Belo
