Marka Setembru Negro ba dala-27, Kovalima organiza sertame istória ba alunu sekundáriu
KOVALIMA, 04 Setembru 2026 (TATOLI) – Iha ámbitu komemora komemorasaun Masakre Setembru Negro 1999 ne’ebé marka tinan-27, Autoridade Munisípiu Kovalima realiza kompetisaun sertame ba alunu sira iha nível ensinu sekundáriu, hodi sukat alunu sira-nia koñesimentu kona-ba matéria Istória Timor-Leste.
Kompetisaun sertame ne’e hala’o ho tema ofisiál “Memória Sei Moris Nafatin, Sakrifísiu Sira Sei La Haluha, Istória Sei Nafatin Ko’alia.”
Autoridade Kovalima hateten atividade ne’e mos nu’udar parte husi komemorasaun Masakre Setembru Negro 1999, ne’ebé tinan ida-ne’e marka tinan-27.
“Ita realiza atividade sertame ne’e iha ámbitu komemora Masakre Setembru Negro, ho intensaun atu sukat alunu sira-nia koñesimentu kona-ba matéria sira,kona-bá Istória Jerál Timor-Leste no mós atu motiva alunu sira atu aprende liután,” Prezidente Autoridade Munisípiu Kovalima, Miguel Armada Cardoso hato’o liuhusi nia diskursu iha salaun AMC.
Notísia relevante:Sobrevivente Masakre Setembru Negro husu joven buka hatene istória pasada TL
Autoridade Kovalima husu ba profesór sira atu kontinua fó hanorin ne’ebé di’ak no garante kualidade edukasaun, hodi nune’e alunu sira bele kompete ho munisípiu sira seluk.
Partisipasaun instalasaun eskolar iha prosesu kompetisaun
Atividade ne’e kobre partisipasaun husi eskola sekundáriu lima ne’ebé mak:
- Eskola Sekundáriu Ave Maria Suai
- Eskola Sekundáriu Jerál Públiku Suai
- Eskola Tékniku Vokasionál Kristal
- Eskola Tékniku Vokasionál Akar Laran
- Eskola Kafe
Atu garante prosesu ne’e la’o ho transparánsia no tuir regra ne’ebé determina, komisaun organizadora konvida ekipa juri husi eskola lima ne’ebé partisipa, no mós observadór husi kada eskola atu haree no asegura la’o ho di’ak.
Notísia relevante:Masakre Setembru Negro nia hun mai hosi 26 fevereiru 1999
Jornalista: Celestina Teles
Editór: Rafael Ximenes de A. Belo
