PM Xanana konsidera Jokowi nu’udar líder ne’ebé iha vizaun boot ba dezenvolvimentu nasionál
DILI, 05 Setembru 2026 (TATOLI)–Primeiru-Ministru, Kay Rala Xanana Gusmão, hasoru-malu ho Eis Prezidente Repúblika, Joko Widodo (Jokowi), iha solo, Indonézia, hodi hala’o enkontru amizade tanba konsidera Jokowi nu’udár líder ne’ebé sempre iha vizaun boot ba dezenvolvimentu nasionál iha Indonézia.
Enkontu amizade ne’e hala’o iha rezidénsia privadu Jokowi nian, Rua Kutai Utara No. 01, Solo, Surakarta, Java Sentrál, Indonézia, iha loron sesta ne’e (04/09), hafoin Primeiru-Ministru, Kay Rala Xanana Gusmão ho ekipa delegasaun ramata enkontru negosiasaun ronda dahaat delimitasaun fronteira marítima iha Indonézia.
Tuku 12:26 oras lokál Indonézia nian, Primeiru-Ministru, Kay Rala Xanana Gusmão ne’ebé hatais kamiza batik, to’o iha odamatan rezidénsia Eis-Prezidente da-7 Repúblika Indonézia, Joko Widodo (Jokowi).
Iha sorumutu ne’e, Eis Prezidente Repúblika Indonézia, Joko Widodo, simu PM Xanana ho kontente no hato’o mós saudasaun amizade, laiha asaun formalidade, maibé sira na’in-rua konversa oituan molok tama bá rezidénsia, hodi hahú momentu enkontru ida-ne’ebé nakonu ho familiaridade no amizade.
Primeiru-Ministru, Kay Rala Xanana Gusmão hato’o nia admirasaun ba lideransa Jokowi nian durante mandatu nu’udár Prezidente Repúblika Indonézia. Tanba nia nu’udár líder ida ne’ebé iha vizaun bá-oin no fó-atensaun ba dezenvolvimentu nasionál ne’ebé ekitativu, inklui mós iha área sira fora hosi Illa Java, nune’e laiha territóriu ida-ne’ebé hela iha kotuk.
“Jokowi nu’udár líder ida ne’ebé buka halo dezenvolvimentu bá iha territóriu hotu-hotu no la husik ema ida ka área ida iha kotuk. Buat ne’ebé importante hosi Jokowi maka harii nasaun ida-ne’ebé forte no inkluzivu. Jokowi iha povu Timorense nia fuan. Agradese bá ita-bo’ot nia kontribuisaun,” Xefe Governu ko’alia bainhira sira konversa hamutuk iha rezidénsia Jokowi.
Nune’e, PM Xanana Gusmão dehan relasaun entre nia ho Jokowi mós sei la limita de’it bá relasaun entre eis no atuál líder. Entaun enkontru iha Solo ne’e hatudu dimensaun umana hosi amizade ne’ebé dezenvolve durante sira nia relasaun, iha tempu sira servisu nu’udár líder nasaun rua nian.
“Tamba ne’e, ha’u hato’o agradesimentu ba Jokowi tanba konvida ha’u atu vizita no hasoru-malu iha Solo, liuliu iha Jokowi nia rezidénsia,” nia hato’o.
Jornalista: Alexandda da Costa
Editór: Xisto Freitas da Piedade
