Autoridade Munisípiu Kovalima Komemora Masakre Setembru Negro 1999 ba Da-XXVII
KOVALIMA, 06 Setembru 2026 (TATOLI)—Prezidente Autoridade Munisípiu Kovalima, Miguel Armada Cardoso, hamutuk ho Prezidente Konsellu Kombatente Libertasaun Munisípiu Kovalima, Komandante PNTL Munisípiu Kovalima no entidade relevante sira Komemora Masakre Setembru Negro 1999 ba Da-XXVII (06 Setembru 1999-06 Setembru 2026), iha Kovalima, Domingu (6/9).
Atividade komemorasaun ne’e hahú ho selebrasaun misa, hafoin kontinua ho serimónia kari ai-funan no sunu lilin iha Monumentu Masakre Setembru Setembru 1999.
Prezidente Autoridade Munisípiu Kovalima, Miguel Armada Cardoso, hateten katak komemorasaun ne’e importante tebes ba povu Kovalima atu kontinua hanoin no fó onra ba matebian sira-ne’ebé sakrifika sira-nia moris luta ba ukun-rasik an.
Notísia relevante: Sarani Covalima hanoin hikas padre na’in-tolu nia mate kari ai-funan iha monumentu
“Ohin loron ne’e, loron espesiál ba Munisípiu Kovalima, tanba ita komemora Masakre Setembru 1999 ba Da-XXVII. Ita tenke kontinua hanoin no fó onra ba sira-ne’ebé sakrifika sira-nia moris ba independénsia Timor-Leste,” Miguel dehan iha Momentu Masakre Setembru Negro 1999, Suai.
Nia hateten katak atividade kari ai-funan no sunu lilin kada tinan realiza atu relembra fali matebian sira no sira-nia sakrifísiu.
“Sentidu hosi kari ai-funan no sunu lilin mak atu relembra fali ita-nia matebian sira-ne’ebé sosa independénsia ho sira-nia moris. Ita ne’ebé sei moris tenke kontinua hatutan sira-nia obra no dezenvolve nasaun ne’e,” nia tenik.
Nia apela ba joven sira atu sai kontinuadór hosi prosesu luta no dezenvolvimentu nasaun, liuhosi unidade, kolaborasaun no fó apoiu ba autoridade sira.
Iha sorin seluk, Pároku Igreja Maukatar, Padre Joanito Mendonça, hateten katak Masakre Setembru Negro 1999 sei sai parte importante hosi istória no memória povu Kovalima, liuliu tanba Padre na’in-tolu hamutuk ho fiél liu ema 100 mate iha akontesimentu ne’e.
Nia hateten katak Padre na’in-tolu hametin fiél no fó sira-nia moris ba ema seluk tenke sai ezemplu ba jerasaun ohin no aban.
Padre haktuir bazeia ba observasaun durante tinan hirak liubá, konxiénsia no fiar hosi komunidade sarani presiza kontinua hamoris no hametin, liuliu entre jerasaun foun.
“Ita hotu presiza iha konxiénsia katak loron ida-ne’e importante ba povu Kovalima. Maibé, ha’u husu partisipasaun másima hosi ema hotu atu hanoin no valoriza sira-nia sakrifísiu. Iha Evanjellu hatudu katak domin laiha buat ida boot liu ida-ne’e, katak ema fó nia-an ba nia belun sira-nia moris,” nia subliña.
Padre Joanito apela ba komunidade, liuliu joven sira, atu kontinua aprende hosi istória no sakrifísiu hosi vítima sira, nune’e memória Masakre Setembru Negro 1999 la lakon no bele sai inspirasaun ba jerasaun sira tuirmai.
Komemorasaun Masakre Setembru 1999 iha Kovalima realiza iha kada tinan hodi fó omenajen ba vítima sira no hametin memória koletiva kona-ba sakrifísiu sira ba independénsia Timor-Leste.
Jornalista: Celestina Teles
Editór: Xisto Freitas da Piedade
