Sarani Covalima hanoin hikas padre na’in-tolu nia mate kari ai-funan iha monumentu
COVALIMA, 06 setembru 2023 (TATOLI)—Administradór Munisípiu Covalima, Francisco de Andrade, hateten loron 06 fulan-setembru kada tinan ne’e sarani sira no Covalima-oan sempre tau ai-funan sai hanesan tradisaun hodi hanoin hikas istória pasada milísa Mahidi no Laksaur oho padre na’in-tolu (Hilario, Francisco no Dewanto) iha igreja Ave Maria Suai ne’ebé koñesidu ho Masakre Setembru Negro 1999.
Notísia Relevante: Masakre Suai 1999: Padre Hilario-Francisco-Dewanto hakoi iha tasi ibun Metamau
“Iha loron 6 fulan-setembru tinan tinan ita sempre tau ai funan sai hanesan tradisaun hodi hanoin hikas istória pasada masakre setembru negro 1999, iha tinan 24 liu ba, milisia pro-indonézia halo asaun tiru hodi oho sua-oan sira iha igreja Ave Maria Suai,” Francisco de Andrade hateten ba jornalista sira iha resintu monumentu masakre Setembru Negro 1999, kuarta ne’e.
Iha momentu ne’e, membru milísia Mahidi no Laksaur sira hamosu Masakre Setembru Negro, tanba sira mak asalta padre na’in-tolu (Hilario Madeira, Francisco Soares no Tarsisius Dewanto) hamutuk sarani-sira mate iha igreja Ave Maria Suai.
Prezidente komisaun Organizadora, Domingos Oliveira “Foti Riba” dehan, loron 6 fulan-setembru loron ne’ebé espesiál hodi hanoin hikas tinan 24 masakre setembru negro 1999 , nune’e atu halo komemorasaun ba tinan oin tenke halo kedas preparasaun.
Hafoin Administradór Munisípiu Covalima tau ai-funan iha monumentu Masakre Setembru Negro 1999 kontinua hala’o viajen ba fronteira atu tau ai-funan iha padre na’in-tolu nia kahoi fatin iha tasi ibun Metamau, Wemasa Betun, Timor Osidentál, Indonézia, maibé la konsege to’o iha padre na’in-tolu nia fatin hakhoi tanba falta kordenasaun iha área fronteira.
Notísia Relevante: Setembru Negro, mate-isin butuk iha igreja oin hanesan foho oan ida
Jornalista : Celestina Teles
Editór : Cancio Ximenes
