Estudante 125 iha EBF Nefomtasa Nítibe benefísia formasaun kona-ba informátika
OEKUSI, 07 Agostu 2026 (TATOLI) – Adapta ba globalizasaun, Estudante na’in-125 iha Eskola Bázika Filiál (EBF) Nefomtasa, lokaliza iha suku Ban-Afi sub-rejiaun Nítibe, Rejiaun Administrativa Espesiál Oekusi Ambeno (RAEOA), hetan ona formasaun kona-ba informatika hafoin hetan apoia materiál husi Embaixadora Boa-Vontade ba Asuntu Edukasaun iha Timor-Leste, Kirsty Sword Gusmão iha fulan Jullu foin lalais ne’e.
Notísia relevante:Kirsty Gusmão oferese komputadór-mobiliáriu reforsa atividade letiva EBF Nefomtasa iha Oekusi
Sebastião Apu, nu’udar formadór, informa katak formasaun ne’e fahe ba agrupamentu, terseiru ano; fahe ba grupu tolu no segundu siklu 5o no 6o ano fahe ba grupu ida, ho oráriu kursu semana ida hala’o dala tolu. Alvu ba de’it estudante sira iha segundu siklu 5o ano ho 6o ano inklui terseiru siklu husi 7o ano to’o 9o ano.
“Tanba iha ami-nia eskola ne’e, fahe ba turma rua; iha dadersan, ba primeiru no segundu siklu no parte lorokraik ba terseiru siklu, entaun terseiru siklu sira partisipa formasaun iha parte dadersan no segundu siklu partisipa iha oras lorokraik fokuliu ba matéria informátika nian,” nia hateten iha iha EBF Nofomtasa suku Ban-Afi, foin lalais ne’e.
Formadór eskola ne’e esplika katak, formasaun referida foin hala’o semana rua de’it, ho materiá ne’ebé formasaun, hanorin estudante sira oinsa atu loke laptop no taka, hanorin estudante sira kona-ba Mikrosoft Word oinsá hakerek identidade pesoál, oinsá edita, hadi’a liafuan no save.
“Ne’ebé, ami fó instrusaun teória no prátika kedas ho razaun prinsipál, agora ne’e globalizasaun entaun estudante sira presiza hatene utilizasaun teknolojia,” nia hateten.
Notísia relevante:Kirsty Gusmão: Hadomi ki’ikoan sira nu’udar futuru nasaun nian
Antes ne’e iha loron 14 Jullu 2026, Embaixadora Boa-Vontade ba Asuntu Edukasaun iha Timor-Leste, Kirsty Sword Gusmão, oferese apoiu hanesan fasilidade informátika sira hanesan komputadór, mákina impresora no mobiliáriu sira kompostu husi meza no kadeira atu reforsa prosesu aprendizajén Eskola Bázika Filiál (EBF,) 1,2,3 Nefomtasa iha suku suku Ban-Afi sub-rejiaun Nítibe Oekusi.
“Apoia ne’e mai husi Embaixadóra Boa-Vontade ba Asuntu Edukasaun hamutuk ho Primeiru-Ministru, tanba antes ne’e Embaixadora hala’o ona vizita hodi observa direita kondisaun eskola EBF Nefomtasa,” Diretór Rejionál Serbisu Edukasaun Oekusi, Vincêncio Cono informa.
Dirijente edukasaun ne’e esplika katak fasilidade sira-neʼebé eskola simu maka hanesan kadeira meza unidade 200, laptop unidade 20, mákina impresora (printer) unidade rua, no komputadór unidade rua.
Autoridade ne’e hateten, apoia hirak-ne’e entrega direita ba dirijente eskola EBF 1,2,3 Nefomtasa hodi responde ba nesesidade estabelesimentu ensinu nian, tanba antes ne’e diirijente eskola sira maka hato’o proposta iha loron 04 Juñu liubá, tanba preokupasaun ne’ebé eskola enfrenta iha tempu ezame tinan barak ona.
Entretantu, totál estudante iha EBF Nefomtasa hamutuk na’in-125 ho profesór na’in-hitu.
Jornalista: Abílio Elo Nini
Editór: Rafael Ximenes de A. Belo
