Parlamentu presta omenajen ba restu mortál preladu katóliku iha Tasi-Tolu
DILI, 07 Setembru 2026 (TATOLI)-Membru Parlamentu Nasionál hamutuk ho funsionáriu sira presta omenajen ba restu mortál preladu katóliku Don Jaime Garcia Goulart, Don José Joaquim Ribeiro, Monseñor Martino da Costa Lopes, Don Alberto Ricardo da Silva, iha Tasi-Tolu, Dili.
Tuir sekuénsia programa Konferénsia Episkopál Timorense (CEP, sigla portugés), ohin husi tuku 9h10 dadeer to’o 18h00 ba órgaun soberania, ministériu no sekretária Estadu sira, hodi presta omenajen no velóriu ba restu mortál preladu sira-nian.
Tuir observasaun jornalista Tatoli nian iha terrenu, dadeer ne’e órgaun soberania no funsionáriu sira lubun presta omenajen ne’ebé akompaña ho reza hodi fó onra no glória hetan pás iha reinu lalehan nian.
Deputadu Frente Revolusionária Timor-Leste Independente (FRETILIN), David Dias Ximenes “Mandati”, preladu sira ne’e iha duni papél importante ba rai Timór iha luta libertasaun no formasaun timoroan.
“Sira merese duni ita-nia respeitu no konsiderasaun ho estima”, nia hatete.
Igreja nafatin loke espasu ba sarani sira atu halo orasaun iha Esplanada Tasi-Tolu ba urna bispu sira, tuir lista ne’ebé fó sai ona to’o loron 09 Setembru kalan no iha 10 Setembru halo despedida no haloot iha lokraik iha Katedrál, Dili.
Notísia relevante: https://tatoli.tl/2026/09/02/parlamentu-elojia-esforsu-governu-igreja-ba-transladasaun-restu-mortal-preladu-katoliku-sira/
Jornalista: Nelson de Sousa
Editora: Maria Auxiliadora
