Rekomendasaun no resposta kona-ba klínika TBC Sakato ne’ebé abandonada
OEKUSI, 07 Agostu 2026 (TATOLI) – Xefe Suku Nípani sub-rejiaun Pante Makasar, Pedro Eco, rekomenda ba servisu saúde Rejiaun Administrativa Espesiál Oekusi Ambeno (RAEOA), atu funsiona klínika TBC ne’ebé konstrui ona iha aldeia Sakato suku Nípani ne’ebé abandona dezde 2023 to’o ohin loron.
“Uluk autoridade halo ba klínika TBC maibé to’o agora abandona hela, ne’ebé gasta ona osan ne’ebé boot maibé ita la planu atu tau buat ruma hodi bele utiliza, Estadu seluk security (seguransa) no selu cleaner (pesoál limpeza) maibé hanesan de’it ita la uza, tanba ne’e nafatin rekomenda ba Governu liliu servisu saúde bele funsiona edifísiu ne’e,” nia hateten iha suku Nípani, ohin.
Notísia relevante:RAEOA konstrui klínika TBC separa atendimentu ba pasiente
Hatan ba rekomendasaun ne’e, Diretora Servisu Saúde Rejionál Oekusi, Odete Amado Martins rekoñese katak, klínika referida utiliza kedas iha momentu pandemia Covid-19, no parte saúde mós asegura hela ai-moruk kona-ba malária.
La’ós abandona
Maibé, tuir nia, daudaun ne’e, polítika Autoridade RAEOA liuhusi servisu saúde sei utiliza fali kliníka ne’e nu’udar fatin ba pasiente sira-ne’ebé ho moras TBC.
“Bainhira sira hetan tratamentu fulan rua ne’e sira mós hetan nutrisaun garante di’ak, entaun ita-nia planu ba iha fatin ne’e, la’ós ita abandona maibé ita prepara hela atu pasiente sira-ne’ebé sofre kazu TBC, karik iha tempu-badak ita-nia preparasaun kompletu ona maka ita sei utiliza fatin ne’e,” nia hateten.
Notísia relevante:Prezidente Autoridade RAEOA inaugura klínika moras TBC
Entretantu, klínika TBC ne’e konstrui husi mandatu Autoridade Anteriór iha tinan-2021, ne’ebé ezekuta hosi empreza Tafen Kuan Unipesoál Lda, ho valór kontratu $154,551.69 ne’ebé aloka hosi Orsamentu Jerál Estadu (OJE) 2021.
Fasilidade sira iha edifísiu ne’e maka rezidénsia ba pesoál saúde, sala izolamentu ba pasiente TBC hamutuk sala-sia (9), sala atendimentu, sala laboratóriu no sala ba farmasia kompleta ho morru.
Jornalista: Abílio Elo Nini
Editór: Rafael Ximenes de A. Belo
