Veterináriu Vikeke rejista asu lima pozitivu raiva
VIKEKE, 07 Setembru 2026 (TATOLI)—Servisu Ministériu Agrikultura Peska, Pekuária no Floresta (SMAPPF) liuhusi Departamentu Veterináriu Munisípiu Vikeke kontinua rejista asu lima pozitivu vírus raiva iha Postu Vikeke Vila, Munisípiu.
“Daudaun ne’e, númeru asu pozitivu kontinua aumenta tanba iha fulan-Agustu ita rejista asu rua mak pozitivu, maibé iha fulan-Setembru ne’e asu pozitivu sa’e ona ne’ebé ita agora deteta lima mak pozitivu raiva,” Xefe Departamentu Veterináriu Munisípiu Vikeke, Domingos do Carmo ba TATOLI, iha Postu Vikeke Vila, Segunda ne’e.
Notísia relevante: Prevene vírus raiva, Ekipa Veterináriu Vasina asu 260 iha Suku Bahalaraua’in
Domingos hatutan, iha fulan setembru ne’e, veterináriu deteta tan iha suku tolu hanesan Suku Karaubalu, Suku Luka no Suku Karaubalu foti amostra asu nian iha suku tolu referidu, rezultadu hatudu asu tolu pozitivu, nune’e área sira-ne’e sai ona afetadu ba virus raiva.
“Tanba asu sira-ne’e kuandu tata malu sira-ne’e, bele da’et vírus ba asu seluk. Ita haree iha Munisípiu Vikeke kazu asu pozitivu raiva komesa barak ona. Asu sira-ne’ebé pozitivu ne’e deskoñesidu tanba asu na’in laiha,” nia nia haktuir.
Kona-ba prevensaun, nia dehan, iha fulan kotuk ekipa tun ba Suku Bahalaraua’in hodi sona asu sira, maibé komunidade okupadu iha sira-nia natar ne’ebé foin vasina asu 260 de’it.
“Vasina asu ita agora planu hala’o fali iha fulan Outubru tanba ita bá komunidade iha hotu natar, entaun ita labele halo vasina tanba halo vasina asu presiza asu na’in tenke iha hafoin bele kaer asu halo vasinasaun,” nia subliña.
Nia husu komunidade Munisípiu Vikeke tenke tau-atensaun ba asu tanba daudauk ne’e rejista ona asu lima mak pozitivu ba raiva, nune’e la’o tenke kuidadu an no labele han naan asu.
Entretantu, suku sira-ne’ebé rejista kazu raiva kompostu husi iha Suku Uma-Ki’ik asu rua (2) mak pozitivu, Suku Karaubalu asu ida (1), Suku Bahalaraua’in asu (1) no Suku Luka asu (1).
Jornalista: Vitorino Lopes da Costa
Editór: Xisto Freitas da Piedade
