Floresta Kovalima arrekada reseita rihun-10 resin ba kofre Estadu
KOVALIMA, 08 Setembru 2026 (TATOLI) –Floresta Munisípiu Kovalima, husi Janeiru to’o Agostu 2026, kontribui ona reseita $10.524,75 ba kofre Estadu, Xefe Departamentu Reprezentasaun Territoriál Floresta, Planta no Indústria Kovalima, Domingos Gusmão, relata.
Nia esplika, reseita ne’e mai liuhusi fonte reseita lisensa negósiu ba ema ka empreza sira ne’ebé hala’o atividade transportasaun ai-indústria, inklui ai-teka no tipu ai seluk, husi Munisípiu Kovalima ba Dili.
“Hahú husi Janeiru to’o Agostu 2026, Floresta Munisípiu Kovalima kontribui ona reseita US$10.524,75 ba kofre Estadu. Reseita ne’e mai husi atividade transportasaun ai ne’ebé presiza lisensa, inklui ai-teka no tipu ai seluk ne’ebé transporta husi Kovalima ba Dili,” Ezekutivu ne’e hato’o ba jornalista sira, ohin.
Tuir nia, reseita ne’ebé hetan husi lisensa no atividade floresta sira ne’e sai parte husi kontribuisaun setór floresta ba aumentu reseita Estadu.
Autoridade ne’e énfaze, Departamentu Reprezentasaun Territoriál Floresta, Planta no Indústria Kovalima sei kontinua halo kontrolu no monitorizasaun ba atividade transportasaun ai, atu asegura atividade hirak ne’e hala’o tuir prosedimentu no regra ne’ebé vigora.
Falta transporte
Iha sorin seluk, Guarda Floresta Munisípiu Kovalima, João Amaral, hateten katak falta transporte motorizadu sai obstákulu ida ba Guarda Floresta sira atu hala’o kontrolu no monitorizasaun iha área floresta.
Durante ne’e, tuir João Amaral, Guarda Floresta sira uza transporte motorizadu privadu atu hala’o atividade kontrolu, inklui monitoriza sidadaun sira ne’ebé ko’a ai sein lisensa.
“Ami preokupa tebes tanba la iha transporte motorizadu. Durante ne’e, Guarda Floresta sira uza de’it transporte motorizadu privadu no sira tenke selu rasik kombustível atu hala’o kontrolu ba sidadaun sira ne’ebé ko’a ai la iha lisensa,” nia haktuir.
Notísia relevante:Guarda floresta presiza kontrola másimu ba komunidade kasa balada fuik
João Amaral salienta, Guarda Floresta presiza apoiu transporte no kombustível atu bele aumenta kontrolu iha territóriu, tanba atividade ko’a ai ilegál sei kontinua akontese iha área balun.
Nia konsidera katak, ho apoiu meiu transporte ne’ebé sufisiente, Guarda Floresta bele aumenta atividade kontrolu no monitorizasaun, nune’e bele kontribui ba protesaun floresta no aumentu reseita Estadu.
Jornalista: Celestina Teles
Editór: Rafael Ximenes de A. Belo
