Misa Finál, PNTL sei blokeia dalan ne’ebé restu mortál Preladu sira liu

DILI, 08 Setembru 2026 (TATOLI)—Komandu Polísia Nasionál Timor-Leste (PNTL) Dili sei blokeia dalan ne’ebé restu mortál Preladu na’in-haat liu husi Tasi-Tolu to’o fatin serimónia fúnebre iha Igreja Katedrál Dili, Vila-Verde, iha loron Kinta (10/09).

Komisaun Organizadora Igreja nian sei organiza Misa Finál ba Transladasaun no Fúnebre ba Preladu na’in-haat iha tuku 17:00, ne’ebé sei prezide husi Arsebispu Dili no Prezidente Konferénsia Episkopál Timoroan, Kardeál Dom Virgílio do Carmo da Silva.

“Komandu mós sei taka dalan husi rute sira ne’ebé mak ita-nia restu mortál Preladu na’in-haat liu hafoin Misa iha Tasi-Tolu iha dia 10, ita sei taka hahú oras 15:00 lorokraik. Dalan husi parte eskerda ita sei taka, sei husik estrada husi parte direita mak halo movimentu bá-mai. Ita taka provizóriu para labele hamosu engarrafamentu bainhira transladasaun restu mortál bá-mai tenke la’o di’ak ho susesu,” Komandante PNTL Munisípiu Dili, Komisáriu Asistente Polísia Orlando Gomes, hato’o ba jornalista sira liuhusi konferénsia imprensa ne’ebé hala’o iha Tasi-Tolu, Tersa ne’e.

Notísia relevante : Sarani sira presta omenajen ba restu mortál preladu katóliku iha Tasi-Tolu

Rute ne’ebé mak sei taka hahú husi Tasi-Tolu, Komoro to’o Igreja Katedrál Dili, Vila-Verde.

Nia informa, durante Misa iha Tasi-Tolu, karreta públiku, karreta privadu, no motorizada sira hotu sei para iha parte tasi-ibun to’o iha “Selamat Datang” ne’ebé hanesan baliza entre Dili ho Likisá.

“Iha rai metan fatin ne’ebé mak ita prepara atu nune’e hotu-hotu kumpre para labele provoka engarrafamentu. Karreta sira ne’ebé tama iha fatin serimónia Tasi-Tolu so ita-nia órgaun soberania haat, membru Parlamentu, Governu inklui entidade importante sira seluk, Igreja, Amu Bispu sira, Padre no Madre sira mak bele tama iha laran testu ita koloka iha tasi-ibun,” nia akresenta.

Iha fatin Fúnebre Preladu na’in-haat iha Igreja Katedrál sei blokeia hahú tuku 17:00 lorokraik.

“Tanba Katedrál fatin ne’ebé mak ita identifika ona atu nune’e ita tenke fó onra, dignidade, dame no hakmatek bainhira reliza serimónia Fúnebre ba ita-nia restu mortál,” nia katak.

Komandu Munisípiu Dili husu ba públiku katak bainhira selebra Misa hotu iha Tasi-Tolu no hakat ba serimónia Funebre iha Katedrál, populasaun, sarani no joven sira hotu tenke kumpre regra Kódigu Tranzitu nian.

“Nafatin la’o disiplina tuir regra ne’ebé mak iha atu nune’e serimónia bele la’o di’ak no susesu,” nia tenik.

PNTL sei hala’o seguransa tuir tátiku dahuluk no sei halo seguransa iha Tasi-Tolu, ne’ebé sei koloka membru sira iha fatin risku tuir rute ka dalan sira ne’ebé mak presiza koloka.

“Ita sei tau seguransa iha Katedrál ho másimu hodi asegura serimónia Fúnebre ba ita-nia restu mortál Preladu na’in-haat oinsá mak atubele halo monitorizasaun ba situasaun seguransa durante serimónia iha Tasi-Tolu to’o serimónia Fúnebre iha Katedrál,” Komandante tenik.

Jornalista     : Natalino Costa

Editora          : Julia Chatarina