Preladu-na’in haat sei haloot ho Guarda de Onra Militár

DILI, 08 Setembru 2026 (TATOLI)—Komisaun husi Igreja sei haloot Preladu na’in-haat (Bispu Dom Jaime Garcia Goulart, Bispu Dom Joaquim Ribeiro, Monseñor Martinho Costa Lopes no Bispo Dom Alberto Ricardo da Silva) ho Guarda de Ondra Militár, iha loron 10 Setembru, iha Katedrál Dili, Vila-Verde.

Razaun haloot ho kustrume militár tanba haree ba Preladu na’in-haat nia kontribuisaun indeskansável ba luta libertasaun Timor-Leste nian.

Prezidente Komisaun Organizadora ba Transladasaun Restu Mortál Preladu sira, Padre Guilhermino da Silva, esplika, tuir ajenda ba fúnebre, hafoin Misa iha Tasi-Tolu sei lori Preladu sira-nia urna bá Katedral Dili no iha prosesu transladasaun husi Tasi-Tolu to’o Igreja Katedrál Dili.

“Sei akompaña husi Militár sira, nune’e bainhira to’o iha Igreja Katedrál sei simu ho Parada Militár hafoin lori bá Igreja laran, sei akompaña husi Kapitaun Lima no iha serimónia fúnebre sei tiru salvu no tiru kaiñaum nu’udar símbolu katak fó onra a’as liu ba Preladu na’in-haat nu’udar Grande Eroi ba Timor-Leste,” Padre Guilhermino da Silva hateten ba jornalista sira liuhusi konferénsia imprensa ne’ebé hala’o iha Tasi-Tolu, Tersa ne’e.

Notísia relevante : Misa Finál, PNTL sei blokeia dalan ne’ebé restu mortál Preladu sira liu

Nia dehan, molok haloot restu mortál Preladu sira, sei hahú ho Santa Misa no aktu ofisiál sira iha Esplanada Tasi-Tolu, ne’ebé hahú iha tuku 17:00 lorokraik.

Misa sei prezide husi Arsebispu Dili no Prezidente Konferénsia Episkopál Timoroan (CET), Kardeál Dom Virgílio do Carmo da Silva, hamutuk ho Amu Bispu Deoseze Maliana no Baukau ho Relijiozu inklui sarani sira tomak.

Hafoin misa kontinua ho diskursu ofisiál sira husi CET, lee leitura despaisu agradesimentu husi Dom Norberto do Amaral, no Prezidente CET sei hato’o ninian deskursu sei tuir kedan ho Reprezentante Santa Sé iha Timor-Leste Monseñor Marcel Smejkal no tuir kedan Prezidente Repúblika, José Ramos-Horta.

Hafoin misa, sei lori Preladu sira-nia urna ba Katedral Dili nu’udar fatin deskansa ikus nian.

Komboiu transladasaun Prelandu sira-nia urna husi Tasi-Tolu hakat liu rotunda Nicolau Lobato Komoro, Fatuhada, Kampung Alor, Aitarak-Laran liuhusi dalan Kolmera to’o iha Igreja Imaculada da Conceição Katedrál, Vila-Verde, Dili.

“Iha Katedrál Parokianu Katedrál Dili sei simu urna sira ho tradisaun kultura Timor iha portaun Igreja Katedrál nian, sei lori to’o iha área determinadu protokolár nian hafoin entrega ba iha Sesaun Ala de porta de urna ne’ebé lidera husi Kapitaun Lima bá to’o iha Igreja laran. Hahú kedan ho serimónia fúnebre restu mortál to’o ramata. Too iha kontinénsia onra militár no tiru Salvu iha Igreja Katedrál,” Padre Guilhermino informa.

Nia relata, liña komboiu kompostu husi Bispu sira, orgaun soberanu inklui konvidadu identifikadu sira.

“Ba maluk sira ne’ebé partisipa iha Misa Tasi-Tolu sei la bá tan Katedrál Vila-Verde, sira bele asiste de’it liuhusi transmisaun direta ne’ebé RTTL ho GMN-TV fó sai iha Tasi-Tolu. Ba komboiu ne’ebé sei liuhusi dalan ka rute ne’ebé temi ona estrada sei taka totál provizóriu hahú oras tuku 17:00 lorokraik to’o serimónia fúnebre iha Katedrál ramata,” nia tenik.

Kondisaun ne’e hodi garante mobilidade membru Governu no alta entidade sira labele hetan engarrafamentu ba to’o Katedrál ho oras ne’ebé marka ona. Tanba Komboiu ne’ebé naruk liu sei halo atraza iha dalan.

Komisaun husu atu konvidadu sira no alta entidade sira husi Estadu no Igreja uza transporte ne’ebé komisaun prepara ona husi Tasi-Tolu bá Katedrál.

Komisaun limita mídia sira halo kobertura tanba kestaun fatin iha Katedrál ne’ebé limitadu, liuliu iha Igreja laran.

“Husu ba mídia sira seluk bele foti output husi liña tranzisaun husi ofisiál RTTL no GMN-TV nian ba publika haloot restu mortál Preladu sira iha Katedrál Dil,” Padre Guilhermino hato’o.

Komisaun husi parte Governu no Igreja husu ba públiku koopera, liliu ba sira ne’ebé hela iha Dili laran, nune’e prosesu transladasaun no fúnebre restu mortál Preladu sira bele la’o ho dignu no hakmatek.

Jornalista     : Natalino Costa

Editora          : Julia Chatarina