UPM halo apreensaun ba ró ida no detein suspeitu na’in-lima
DILI, 08 Setembru 2026 (TATOLI)—Unidade Polísia Marrítima (UPM) iha Segunda ne’e, halo apreensaun ba ró ida tanba diteta halo prátika peska ilegál iha área Tasi Timor.
Komandante UPM, Superintendente Xefe Eugénio Pereira, hateten, UPM halo operasaun purvolta tuku 20:00 kalan no konsege deteta katak iha ró ida mak halo peska ilegál to’o iha área Tasi Behau.
“Nune’e, ekipa halo apreensaun ba ró ne’e asegura no detein ho fraglante delitu ba suspeitu na’in-lima tanba suspeitadu halo prátika atividade peska ilegál iha Tasi Timor,” Komandante hato’o Tersa ne’e.
Notísia relevante : AMN rejista ró 50 halo peska ilegál iha Tasi Timor durante fulan-lima ikus
Suspeitu na’in-lima husi nasaun orijen Xina ho inisiál TJ, HZT, HZ,TA no TFL. UPM daudaun ne’e foti ona ró ne’e iha área Behau hodi lori bá Kuartél.
Iha parte seluk Servisu Investigasaun Kriminál (DSIK) halo prosedimentu investigasaun ba suspeitu sira.
“Ami asegura hela. Prosesu ne’e suspeitu na’in-lima agora detein hela iha sela no agora sira Investigasaun Kriminál mak halo hela prosesu,” Komandante Eugénio Pereira informa.
Nia dehan, atu komprova ba sira-nia aktu krime halo prátika peska ilegál ne’e provizóriamente labele ko’alia de’it tanba sei iha prosesu investigasaun.
Jornalista : Natalino Costa
Editora : Julia Chatarina
