Autoridade Kelikai Antigu garante implementasaun PNDS ho kualidade
BAUKAU, 09 Setembru 2026 (TATOLI)—Autoridade Postu Administrativu Kelikai Antigu garante prosesu implementasaun atividade regulár Programa Nasionál Dezenvolvimentu Suku (PNDS) tinan-ne’e ho kualidade.
Administradór Postu Administrativu Kelikai Antigu, Francisco Matias Gusmão, esplika prosesu implementasaun atividade PNDS tinan-ne’e sei iha progresu ne’ebé hala’o iha suku tolu hanesan Afasá, Gurusá no Namanei ho tipu projetu diferente tuir rezultadu reuniaun Konsellu Suku bazeia ba nesesidade komunidade.
“PNDS labele kestiona tanba to’o fulan-Novembru projetu sira termina hotu ona. Ita akompaña hela programa ne’e husi inísiu ho di’ak,” Administradór Postu Administrativu Kelikai Antigu hateten iha Vila Nova, Baukau, Kuarta ne’e.
Francisco Gusmão relata atividade PNDS iha Suku Afasá atualmente implementa konstrusaun estrada rurál liuhusi tipu cor betaun ho naruk metru 270 iha Aldeia Uecubuti no Borolai ne’ebé atinje ona pursentu 37, enkuantu iha Suku Gurusa atinje ona pursentu 45 liuhusi atividade konstrusaun estrada rurál no morru protesaun ho distánsia metru 100 iha Aldeia Uadaboru no Suku Namanei implementa atividade konstrusaun Sentru Komunitáriu iha Aldeia Darenafa ne’ebé atinje ona pursentu 58.
“PNDS iha Postu Administrativu Kelikai Antigu la’o tuir prosesu no hein katak projetu sira hotu bele ramata tuir tempu ne’ebé planeiadu,” Francisco Gusmão akresenta.
Autoridade Postu Administrativu Kelikai Antigu konsidera programa PNDS iha nivel suku fó impaktu diretu iha baze liuliu hadi’a infraestrutura bázika no fó benefísiu ba komunidade hanesan envolve iha serbisu hodi aumenta rendimentu.
Entertantu, Autóridade Postu Kelikai Antigu tinan-ne’e hetan aloksaun orsamentu programa PNDS iha suku tolu hanesan Afasá, Gurusá no Namanei hamutuk rihun $90-resin iha-ne’ebé kada suku ezekuta orsamentu $30-resin.
Jornalista: Natalino Belo
Editór: Xisto Freitas da Piedade
