Ekipa konjunta detein sidadaun estranjeiru na’in-12 ba scam call center iha Garden Beach
DILI, 10 Setembru 2026 (TATOLI)–Ekipa konjunta ne’ebé kompostu husi Diresaun Servisu Investigasaun Kriminál (DSIK) hamutuk ho Diresaun Servisu Informasaun Polísia (DSIP), iha Kuarta (09/09) purvolta tuku 00:00 detein tan sidadaun estranjeiru hamutuk-12 iha Otél Garden Beach, ne’ebé lokaliza iha Aldeia 03 Suku Fatuhada, Postu Administrativu Dom Aleixo, Munisípiu Dili.
Operasaun ne’e bazeia ba populasaun balun iha Fatuhada nia informasaun, ne’ebé hato’o katak iha estranjeiru balun halo prátika scam call center.
Nune’e, ekipa halo kedan operasaun ho fraglante delitu hodi asegura no detein suspeitu sira ne’ebé suspeitadu ba prátika ne’e.
Portavós Komandu Polísia Nasionál Timor-Leste (PNTL), Superintendente Xefe Polísia João Belo dos Reis, haktuir, ekipa halo intervensaun ba otél nomós apartamentu ida iha parte Pantai kelapa.
“Ami kaptura sidadaun estranjeiru hamutuk na’in-12 ho evidénsia sira hanesan leptop tolu, telfone 22 no starlink rua inklui karreta ida,” Portavós hato’o ba Jornalista sira iha Kuartél Jerál PNTL, Kinta ne’e.
Notísia relevante : Kazu Scamming Call Center Kolmera, Tribunál aplika kauzaun $4000 ba arguidu na’in-neen
Nia dehan, tanba iha fraglante delitu autór sira ne’ebé maka Polísia asegura no detein transporta kedas mai iha Kaartél Jerál iha parte investigasaun kriminál hodi halo identifikasaun.
“Sira na’in-12 ne’e mós ita detein kedas iha sela detensaun Komandu Munisípiu Dili, kazu ne’e ita tau ba NUC rejista ho 0346/2026 PNSIK,” nia akresenta.
Bainhira Polísia asegura no detein sira, informa kedas ba sira-nia diplomata iha ne’e atu sira bele iha informasaun sufisiente kona-ba sira-nia sidadaun ne’ebé maka hetan detensaun.
“Kona-ba sira-nia dokumentu agora ita halo hela identifikasaun ita rekolla hela informasaun nesesáriu ne’ebé maka bele ajuda, sira balun iha pasaporte, balun pasaporte sira tau hela iha fatin, ne’ebé ita sei rekolla hotu depois ita sei aprezenta ba Ministériu Públiku iha oras 72 nia laran,” nia tenik.
Jornalista : Natalino Costa
Editora : Julia Chatarina
