FFTL anunsia jogadór 23 ba FIFA ASEAN Cup 2026
DILI, 10 Setembru 2026 (TATOLI)–Federasaun Futeból Timor-Leste (FFTL) ofisialmente anunsia ona lista finál jogadór 23 hodi reprezenta Timor-Leste iha kompetisaun FIFA ASEAN Cup 2026.
Lista ne’e inklui jogadór sira husi liga lokál no mós jogadór sira-ne’ebé joga iha li’ur hanesan Austrália, Portugál, Indonézia, Malázia no Europa.
Diretór Selesaun Nasionál FFTL, João Maneco, hateten partisipasaun Timor-Leste iha jogu FIFA Asean Cup ne’e importante tebes.
“Ida-ne’e jogu obrigatóriu, tanba ligadu ho it- nia ranking, ita presiza rezultadu ida-ne’ebé di’ak atu hasa’e fali ita-nia ranking, tanba daudaun ne’e ita hela iha ranking 201,” Diretór ne’e hateten ba jornalista sira iha edifidiu FFTL, kinta ne’e.
Nia esplika, iha jogu ne’e Timor-Leste konsege hetan rezultadu pozitivu iha jogu rua hasoru Myanmar no Kamboja, ne’ebé sei fó impaktu boot ba pontu nian no lori Timor-Leste sai husi ranking 201.
Husi totál jogadór 23, jogadór sia mai husi klubi lokál hanesan Karketu Dili FC, Santa Cruz FC no AD Santo António FC.
Nune’e mós, jogadór 14 seluk joga iha li’ur. Barak liu iha Austrália ho klube hanesan Western Sydney Wanderers no Canterbury Bankstown. Iha mós jogadór iha Portugál, Indonézia, Malázia, Malta, Kroásia no Irlanda Norte.
“Ita iha jogadór sira-ne’ebé hetan ona esperiénsia iha li’ur. Ida-ne’e importante tebes atu aumenta kompetitividade ekipa nian iha ASEAN Cup,” nia dehan.
Jogadór sira husi Liga Lokál
Jogadór sira-ne’ebé selesiona husi lokál mak hanesan Egidio L. C. X. de Oliveira, Alexandre O. Lima Quintao, Juvito Moniz, Anizo Correia, Luis Figo P. Ribeiro, Palomito A. C. Ribeiro, Olagar F. Malik Xavier, Santiago X. J. da Costa, Alexandro B. Corsino Lemos.
Jogadór sira husi Liga Internasionál
Jogadór sira-ne’ebé selesiona husi liga internasionál mak hanesan Dylan Jose Niski, Jakson M. P. Fowler, Ryan Harris Jom, Tristan Xavi Arrarte, Zion Plinio D. Bessie Cruz, Joao M. de J. Varudo Afonso, Eric Tomas Tam Silva, Claudio Gomes Osorio, Liam F. Farrugia, Vabio Cannavaro, Oatnasio da Silva Guterres, Paulo D. Gali da C. Freitas, Zenivio M. Gostavo C. Mota Um, Joao Pedro da S. Freitas.
FFTL espera ho eskuadra kombinadu ne’e, Timor-Leste bele fó luta di’ak no hametin orgullu nasionál iha FIFA ASEAN Cup 2026.
Jornalista : Hortêncio Sanchez
Editór : Cancio Ximenes
