Kódigu TUQR Nasionál ba pagamentu dijitál lansa iha 12 Setembru
DILI, 10 Setembru 2026 (TATOLI)-Banku Sentrál Timor-Leste (BCTL, sigla portugés) sei lansa sistema pagamentu dijitál nasionál ho naran Kódigu Timor Unique QR (TUQR) iha loron 12 Setembru.
Inisiativa ida-ne’e sai parte husi transformasaun sistema pagamentu nasionál no evita sirkulasaun osan falsu iha Timor-Leste.
Governadór BCTL, Helder Lopes, hatete katak Kódigu TUQR ne’e loloos lansa iha fulan-Agostu, maibé tanba preparasaun liuliu lei, kritériu ka regulamentu sira entaun muda fali ba Setembru ne’e.
“Sistema foun ida-ne’e importante tebes tanba sei fasilita sidadaun sira atu halo pagamentu liuhusi telemove, la presiza ona uza osan fíziku”, Helder Lopes informa iha Institute of Business (IOB), Dili, ohin.
Nia esplika katak bainhira TUQR lansa, BCTL sei halo parseria ho Indonézia atu TQUR ne’e bele uza iha país ne’e no Indonézia nia Quick Response Code Indonesian Standard (QRIS) ka Mobile payment bele uza mós iha Timor-Leste.
“Bainrua lansa, liuliu estudante sira, imi tenke uza tanba ita mós planeia sei espanda mós ba iha nasaun membru ASEAN hotu”, nia informa.
TUQR ka QR Code ne’e importante tanba promove pagamentu dijitál no ema hotu sei uza telefone hodi halo tranzasaun. Osan fíziku la uza ona, oportunidade ba manipulasaun ka falsifikasaun osan mós sei menus, tanba tranzasaun hothotu halo ho eletróniku.
Tuir governadór, TUQR sei sai padraun nasionál kódigu QR neʼebé fasilita pagamentu dijitál iha setór emprezariál no servisu públiku sira.
Nia dehan implementasaun TUQR sei hala’o ho fazeadamente, tanba Timor-Leste hasoru nafatin dezafiu prinsipál rua mak koñesimentu públiku ne’ebé ki’ik kona-ba pagamentu dijitál no infraestrutura telekomunikasaun ne’ebé limitadu, liuliu iha área rurál.
“Pagamentu dijitál rekere infraestrutura telekomunikasaun internét, maibé iha foho sira asesu ba internét limitadu no ema sira mós seidauk toman atu uza telefone sira ba tranzasaun dijitál sira”, nia esplika.
Tanba ne’e, BCTL sei implementa TUQR tuir faze no prioriza área no setór ekonómiku sira ne’ebé prontu liu atu simu sistema pagamentu dijitál.
Notisía relevante: BCTL lansa kódigu TUQR nasionál ba pagamentu dijitál iha Agostu
Jornalista: Arminda Fonseca
Editora: Maria Auxiliadora
