Remesa husi traballadór timoroan iha semestre dahuluk 2026 hamutuk millaun $104,5
DILI, 10 Setembru 2026 (TATOLI) – Diretór-Ezekutivu ba Ekonomia no Polítika Monetária iha Banku Sentrál Timor-Leste (BCTL, sigla portugés), Gastão de Sousa, informa katak remesa ne’ebé traballadór timoroan iha rai-li’ur haruka mai país atinje millaun $104,5, iha semestre dahuluk 2026.
Nia hatete katak Reinu Unidu no Austrália sai hanesan fonte prinsipál rua ba remesa ne’ebé haruka osan mai Timor-Leste.
Dirijente ne’e esplika katak Revizaun Ekonómiku Médiu-Prazu Timor-Leste 2026 nian hatudu katak remesa ne’ebé tama mai país nafatin aas liu kompara ho osan ne’ebé traballadór Timor-Leste haruka ba rai-li’ur.
“Husi Janeiru to’o Juñu 2026, osan ne’ebé haruka mai to’o millaun $104,50, enkuantu osan ne’ebé haruka sai ba li’ur millaun $47,64. Nune’e, saldu líkidu osan haruka husi traballadór Timor-Leste nian nafatin pozitivu, ho millaun $56,86”, nia hatete.
Nia mós realsa katak Reinu Unidu sai hanesan fonte boot liu ba remesa ne’ebé haruka mai Timor-Leste, ho kontribuisaun porsentu 40,5, tuir fali Austrália ho pursentu 33, no Koreia Súl ho pursentu 11. Enkuantu nasaun sira seluk kontribui hamutuk porsentu 15,5.
Nune’e, Reinu Unidu no Austrália reprezenta koletivamente liu porsentu 73 husi remesa totál hothotu ne’ebé tama iha Timor-Leste iha semestre dahuluk tinan ne’e nian.
Entretantu, Indonézia domina fluxu remesa ne’ebé haruka husi Timor-Leste ba rai-li’ur, ho kontribuisaun porsentu 75,3. Reinu Unidu kontribui porsentu 3,0 no Austrália porsentu 2,1, enkuantu nasaun sira seluk kontribui ba pursentu 19,6.
Dadus BCTL nian mós hatudu katak remesa internu nafatin aas liu kompara ho remesa ne’ebé haruka bá li’ur iha períodu tomak ne’ebé analiza. Iha 2024, remesa intern rejista maizumenus millaun $211,56, kompara ho remesa esternu ho millaun $103,84.
Iha 2025, remesa internu atinje millaun $181,93, enkuantu fluxu esternu hamutuk millaun $109,10. Iha semestre dahuluk 2026, remesa internu rejista millaun $104,50, kompara ho millaun $47,64 ba remesa ne’ebé haruka ba li’ur.
Nia subliña katak saldu remesa pozitivu hanesan fonte importante ida ba rendimentu esternu Timor-Leste, liuliu iha tempu ne’ebé nasaun ne’e hasoru défisit konta korrente ne’ebé aumenta no nesesidade importasaun ne’ebé aas.
Notísia relevante: SEFOPE rejista remesa husi traballadór timoroan iha Korea hamutuk $376.790,00
Jornalista: Arminda Fonseca
Editora: Maria Auxiliadora
