Alkatiri husu atu identifika na’in ba scam call center
DILI, 11 Setembru 2026 (TATOLI)-Sekretáriu-Jerál Partidu Frente Revolusionária Timor-Leste Independente (FRETILIN), Marí Alkatiri, husu ba Primeiru-Ministru, Xanana Gusmão, atu identifika na’in ba kazu scam call center.
Líder partidu opozisaun ne’e hato’o nia preokupasaun kona-ba atividade scam ne’ebé daudaun buras iha Timor-Leste.
Tuir Alkatiri, atividade ne’e liga ho sindikatu krime internasionál ne’ebé uza teknolojia avansada atu hala’o atividade ilegál. Maski autoridade seguransa ka’er ona ema lubun ida ne’ebé suspeita envolve iha atividade ne’e, nia konsidera katak ema sira ne’e la’ós na’in ba atividade referida, maibé vítima ne’ebé serbisu de’it hanesan traballadór.
Tanba ne’e, to’o agora, nia hatete katak seidauk iha klaridade kona-ba sé mak na’in loloos ba atividade scam call center ne’e.
“Na’in loloos sira iha ne’e. Odamatan tama no sai ne’e nakloke hotu. Entaun, na’in iha ita-nia leet. Dalaruma aviaun mak mai foti tan. Ne’e mak ha’u husu ba Primeiru-Ministru atu identifika se?”, nia hatete iha konferiénsia imprensa iha estúdiu MA Podnaroman, Faról, Dili, sesta-feira ne’e.
Lembra katak, dezde tinan kotuk, autoridade seguransa hala’o ona operasaun atu dezmantela sentru operasaun scam 20 iha Oekusi, Dili no fatin seluk.
Operasaun sira ne’e konsge kaptura ema besik 500, ho ema na’in-30 hetan desizaun tribunal atu tama prizaun preventive, enkuantu restu hetan medida kausaun.
Notísia relevante: Ekipa konjunta detein sidadaun estranjeiru na’in-12 ba scam call center iha Garden Beach
Jornalista: Nelson de Sousa
Editora: Maria Auxiliadora
