Konsellu Ministru aprova kalendáriu resenseamentu eleitorál iha estranjeiru
DILI, 11 Setembru 2026 (TATOLI) – Konsellu Ministru aprova ona kalendáriu resenseamentu eleitorál iha estranjeiru, iha ámbitu preparasaun ba Eleisaun Prezidensiál 2027 nian, ne’ebé aprezenta husi Ministru Administrasaun Estatál, Tomás Cabral.
Sekretáriu Estadu Komunikasaun Sosiál, Expedito Dias Ximenes, hatete diploma ne’e estabelese katak operasaun rejistu no atualizasaun resenseamentu eleitorál iha estranjeiru sei hala’o husi loron 08 Outubru 2026 to’o 22 Janeiru 2027.
Operasaun ne’e sei hala’o ho reforsu rekursu materiál no umanu iha misaun diplomátika prinsipál, postu konsulár sira, ho posibilidade atu instala postu móvel sira.
Nia subliña períodu operasaun ne’e naruk atu permite atualizasaun dadus eleitór sira ba sistema biométriku foun, no mós fasilita sidadaun timoroan sira ne’ebé hela iha estranjeiru atu ezerse direitu votu.
“Ita hotu hatene iha 2027 no 2028 nu’udar tinan polítiku, administrasaun estatál ne’ebé toma konta ba resensiamentu ba sidadaun sira ne’ebé ba ona tinan 17 ba leten hodi fó sira-nia direitu polítiku ba iha Eleisaun Prezidénsial 2027 no Lezislativa iha 2028”, nia dehan.
Tuir nia, projetu Governu ne’ebé aprova ona sei fó kompeténsia ba tékniku sira iha Administrasaun Estatál atu hala’o resenseamentu, liuliu ba sidadaun timoroan sira ne’ebé hela iha estranjeiru, hodi garante sira bele partisipa iha Eleisaun Prezidensiál tinan oin.
“Tanba ita mós agora muda ona semi-biométriku ba sistema biométriku. Ida-ne’e atu kontrola sidadaun ida hato’o ninia direitu polítiku iha eleisaun sira”, nia hatete.
Notísia relevante: Resensiamentu eleitorál ba timoroan sira iha diáspora hahú iha Outubru
Jornalista: Arminda Fonseca
Editora: Maria Auxiliadora
