Konstrusaun Sede Suku Makadike Uaitame hahú ona
VIKEKE, 11 Setembru 2026 (TATOLI)—Xefe Suku Makadike Uaitame, Postu Administrativu Uatulari, Munisípiu Vikeke, José Soares Pinto, informa konstrusaun Sede Suku Makadike Uaitame ne’ebé lokaliza iha foho Matebian nia hun daudaun ne’e hahú iha faze konstrusaun.
“Ami-nia sede suku uza provizória uma ida-ne’ebé konstrui husi populasaun Suku Makadike Uaitame. Iha tinan ida-ne’e mak ami foin hetan fundu hodi aloka ba ami-nia sede suku hodi halo konstrusaun sede suku permanete ida ba Suku Makadike Uaitame, atu uza ba atendimentu ita-nia populasaun,” José Soares ba TATOLI, iha Suku Makadike Uaitame, Sesta ne’e.
Notísia relevante: Autoridade Makadike de Baixo no Makadike Uaitame seidauk iha sede suku
Autoridade Suku Makadike Uaitame ne’e hatutan konstrusaun sede suku referidu badaen sira komesa konstrui ona fondasi uma-nian ne’ebé servisu la’o hela.
“Ami-nia obra konstrusaun sede suku ne’e fundu maihusi Programa Nasionál Dezenvolvimentu Suku (PNDS) ba tinan 2026 nian. Konstrusaun ne’e ita-nia badaen sira foin hada fondasi depoiz hotu kontinua tau sinta no hada bloku,” nia subliña.
Nia relata sede suku ne’ebé konstrui ho medida 16m x 7m kompostu husi sala ida no kuartu hamutuk tolu hodi konsellu suku uza ba atendimentu ba komunidade.
“Ha’u sente sede suku ne’e hotu konsellu suku no funsionáriu suku sira sei uza ba atendimentu ita-nia komunidade. Sede ne’e sufisiente ona ba ami hodi uza servisu suku nian,” nia hato’o.
Obra konstrusaun Sede Suku Makadike Uaitame aloka orsamentu husi PNDS ba tinan 2026 hamutuk $14.000.00, durasaun konstrusaun fulan tolu. Enkuantu, obra referida konstrui husi badaen lokál sira iha Suku Makadike Uaitame.
Tuir dadus populasaun, Suku Makadike Uaitame iha aldeia neen no totál hamutuk na’in-686 ho totál uma-kain hamutuk 200.
Jornalista: Vitorino Lopes da Costa
Editór: Xisto Freitas da Piedade
