ME hahú konstrui EPE Taimea atu garante ambiente aprendizajen seguru
BOBONARU, 11 Setembru 2026 (TATOLI) – Ministériu Edukasaun (ME) implementa ona projetu konstrusaun edifísiu Ensinu Pré-Eskolár (EPE) Taimea, suku Malilait, postu administrativu Bobonaru, munisípiu Bobonaru, atu habelar asesu ba edukasaun no garante ambiente aprendizajen ne’ebé dignu no seguru ba estudante no manorin sira.
Obra ne’e implementa husi kompaña lokál Lombel Unipessoal Lda., ho valór kontratu $154. 454,72 ne’ebé hahú iha fulan-Juñu no sei finaliza iha loron 08 Dezembru 2026.
Koordenadora EPE Taimea, Sofia Maia Cosme, hatete katak konstrusaun edifísiu foun ne’e lori sentimentu orgullu no kontente ba komunidade eskolár, tanba antes ne’e estudante no manorin sira hala’o prosesu aprendizajen iha sala ne’ebé kondisaun aat.
“Estadu tau-matan duni ba ami. Astudante sira kontente no ami professora sira mós kontente tebes tanba agora ami hetan ona edifísiu foun”, Sofia dehan ba Tatoli, ohin.
Nia salienta katak edifísiu foun ne’e sei ajuda hadi’a prosesu ensinu no aprendizajen, liuliu bainhira tempu udan no anin, ne’ebé antes ne’e afeta kondisaun saladeaula. Hodi argumenta katak obra foun ne’e finaliza sei atrai estudante sira partisipa iha ensinu no aprendizajen.
“Agora ambiente di’ak ona ba ami. Ba oin, estudante sira barak sei hakarak mai eskola no inan-aman sira mós orgullu ho ida-ne’e. Anin no udan labele afeta tan ami-nia aprendizajen, tanba agora iha ona mahon di’ak”, nia dehan.
Reprezentante inan-aman, Feliciana Soares, realsa katak konstrusaun edifísiu foun ne’e di’ak, tanba durante tempu naruk inan-aman no manorin sira tenke tulun eskola ne’e hodi asegura sira-nia oan bele kontinua aprende.
Notísia relevante: Kondisaun EBF no EP Taimea la seguru ba estudante sira
“Iha tempu ida ne’ebé difísil, ami inan-aman hamutuk ho mestre sira naran tau kalen tahan ba hodi ita-nia oan sira bele aprende. Agora ba oin di’ak ona, tanba edifísiu foun iha ona, estudante sira mós la ta’uk ona mai eskola”, nia dehan.
Konstrusaun edifísiu EPE Taimea ne’e konsidera hanesan pasu importante ida husi Governu atu kontinua hadi’a infraestrutura edukasaun iha área rurál no asegura labarik sira hetan fatin aprende ne’ebé seguru, apropriadu no dignu.
Notísia relevante: Manorin husu ME prioritiza reabilitasaun EPE Gumer
Jornalista: Sergio da Cruz
Editora: Maria Auxiliadora
