Reforsa debitu bee-matan, Autoridade RAEOA planu kuda ai-oan 790 iha aldeia Oénoah
OEKUSI, 11 Setembru 2026 (TATOLI) – Prezidente Autoridade Rejiaun Administrativa Espesiál Oekusi Ambeno (RAEOA), Régio da Cruz Salu, akompaña husi komunidade sira, sesta ne’e, hala’o vizita ofisiál ba bee-matan bee-matan Oélnus, lokaliza iha aldeia Oénoah, no tuir planu sei kuda ai-oan 790 iha Dezembru tinan ne’e, hafoin udan monu rai.
“Bee-matan ne’e fó hemu populasaun uma-kain 79 iha aldeia Oénoah tomak, maibé foin dadaun ha’u liuhusi ne’e, labarik no ferik sira dudu gerobak, nakonu ho jerigen, entaun ha’u husu sira, atu ba kuru bee iha matan ohin ita mai vizita ne’e, ita haree rasik raimolik no maran tebes, entaun ohin ha’u orienta diresaun agrikultura sira, tenke tau ona ba planu, atu kuda iha Dezembru tanba udan, kada uma-kain sei kuda huun 10,ne’ebé totál ai-oan sei kuda 790 iha fatin ne’e,” nia hateten hafoin vizita bee-matan referida.
Entidade másima RAEOA ne’e esplika katak ai-oan ne’ebé sei kuda iha arredór bee-matan ne’e, prioridade ba ai-ne’ebé fornese bee, hanesan hali, jambu, mahoni, bua, la inklui ai-teka.
“Ita sei hili ai-ne’ebé atu haforsa ka aumenta debitu bee-matan, tanba ita haree bee ne’e besik atu maran daudaun, entaun ita tenke tau ba planu, nune’e bele hamoris fali bee-matan ne’e, tanba povu presiza bee-matan ne’e, tantu tempu bailoron no tempu udan,” nia hateten.
Notísia relevante:RAEOA reabilita sistema bee-moos ba sub-rejiaun haat ho kustu rihun $44-resin
Bento Bobo, nu’udar lia-na’in iha aldeia Oénoah, apresia no rekomenda katak, bainhira atu kuda ai-oan presiza mós aplika uluk tara-bandu bazeia enkuadraentu legál suku nian, atu labele halo to’os besik bee-matan.
“Polítika ne’e ami apoia tebes, maibé komportamentu ami hanesan agrikultór, bainhira ita kuda tiha ai-oan iha bee-matan, balu ba lere fali halo to’os ida-ne’e sai problema iha baze la’ós Oénoah de’it maib’e fatin barak, entaun ami rekomenda de’it bele ka la’e halo tara-bandu ba bee-matan sira atu labele halo to’os iha áreadór ne’e, lei suku iha ita tenke aplika ida-ne’e, atu ema hotu bele tauk, selaee kada tinan ita kuda maibé rezultadu laiha, lere to’os depois sunu tan,” nia hateten.
Jornalista: Abílio Elo Nini
Editór: Rafael Ximenes de A. Belo
