Tribunál aplika medida kausaun $5.000 ba arguidu nain-lima suspeitadu peska ilegál iha Hera
DILI, 11 Setembru 2026 (TATOLI)–Tribunál Judisiál Primeira Instánsia Dili (TJPID), Sesta ne’e, liuhusi Juiza Francisca Cabral hasai despaisu hodi aplika medida kausaun $5.000 ba arguidu na’in-lima ne’ebé suspeitadu ba kazu peska ilegál.
Ekipa konjuta husi Unidade Polísia Marrítima (UPM) no Komponente Navál asegura no detein arguidu na’in-lima ho inisiál YA,HZ,YJ YY no HJ husi nasaun orijen Xina, iha Segunda (07/09) iha tasi área Hera, Postu Administrativu Kristu Rei, Munisípiu Dili.
Ministériu Públiku (MP) durante prosesu interrogatóriu dahuluk alega arguidu sira ho krime rua hanesan transasaun ilísitu no asosiasaun kriminoza.
Nune’e, MP husu Tribunál atu aplika medida tolu hanesan prizaun preventiva, proibisaun auzénsia no kausaun osan $5.000 ba kada arguidu.
Notísia relevante : AMN rejista ró 50 halo peska ilegál iha Tasi Timor durante fulan-lima ikus
Parte Defeza husu ba Tribunál atu aplika medida probisaun auzénsia no medida kausaun ba kada arguidu ho valór $3.000.
Hafoin rona tiha parte hotu, Juiza Francisca Cabral hasai despaisu hodi aplika medida koasaun rua hanesan probisaun auzénsia no osan ho valór $5.000 ba kada arguidu.
Arguidu sira iha obrigasaun tenke selu kausaun ne’e iha prazu loron-10 nia laran, kuandu la selu sira tenke responsabiliza ba krime seluk.
Prosesu interrogatóriu dahuluk ne’e prezide husi Juíz Francisca Cabral, MP reprezenta husi Prokuradór Domingos Goveia Leite, arguidu sira hetan asisténsia husi Advogado Privadu Ezaquel Geronimo Amaral.
Rekorda fali katak, ekipa kompostu husi Polísia Nasionál Timor-Leste (PNTL) no FALINTIL-Forsa Defeza Timor-Leste (F-FDTL) halo operasaun iha Segunda (07/09) konsege deteta katak iha ró ida mak halo peska ilegál to’o iha área Tasi hera. Nune’e, iha operasaun ne’e ekipa asegura no detein ho fraglante delitu ba suspeito nain-lima nu’udar sidadaun estranjeiru.
Hafoin ida-ne’e ekipa mós konsege halo apreensaun ba evidénsia sira hanesan telemóvel, starlink, maibé arguidu sira laiha pasaporte orijinál, no ró laiha dokumentu legál.
Jornalista : Natalino Costa
Editora : Julia Chatarina
