Autoridade Kovalima Louva STRAC Organiza Atividade Enduro iha Kovalima
KOVALIMA, 12 Setembru 2026 (TATOLI)—Prezidente Autoridade Munisípiu Kovalima, Miguel Armada Cardoso, Sesta (12/9) ne’e, loke atividade Enduro ne’ebé organiza husi STRAC, iha Munisípiu Kovalima.
Prezidente Autoridade Munisípiu Kovalima, Miguel Armada Cardoso, louva inisiativa STRAC ne’ebé organiza atividade ne’e tanba bele fó espasu ba joven sira atu dezenvolve interese no kapasidade iha modalidade desportiva Enduro.
“Ha’u louva tebes atividade ida-ne’e. Ha’u mós fó hanoin ba partisipante sira atu halai motor ho kuidadu, tanba imi mak futuru Timor-Leste no futuru ba Kovalima,” Miguel Armada Cardoso iha nia diskursu molok loke atividade Enduro iha Kovalima.
Nia mós hato’o agradesimentu ba STRAC ne’ebé organiza atividade ne’e no fó oportunidade ba joven sira husi munisípiu sira seluk atu partisipa.
“Ha’u agradese ba komunidade iha Munisípiu Kovalima liuliu ba ha’u-nia oan, alin sira no grupu sira iha Timor-Leste,” nia dehan.
Prezidente Autoridade Munisípiu Kovalima hateten katak atividade Enduro importante atu anima no motiva komunidade, liuliu joven sira atu envolve-an iha atividade desportiva ne’ebé konstrutiva.
Nia esplika katak atividade Enduro mós bele ajuda partisipante sira dezenvolve mentalidade, konsentrasaun no abilidade atu uza estratéjia no haree tátika bainhira lori motor iha área difísil, inklui iha ai-laran.
Eventu Enduro ne’e iha modalidade oioin, hanesan Enduro Soke Ai Laran, Adventure Trabas no Motorcross.
Bazeia ba dadus organizadór sira, partisipante ne’ebé partisipa iha atividade Enduro ne’e liu ema 200, ne’ebé mai husi munisípiu 12, inklui Rejiaun Administrativa Espesiál Oekusi-Ambeno (RAEOA).
Trail Community organiza eventu ne’e tanba hetan apoiu orsamentu husi Ministériu Juventude, Desportu, Arte no Kultura (MJDAC), hamutuk ho $7,000.
Jornalista : Celestina Teles
Editór : Cancio Ximenes
