Indemniza rai no uma – Komunidade Oénoah rekomenda

OEKUSI, 14 Setembru  2026 (TATOLI) –  Komunidade afetadu sira iha aldeia Oénoah suku Bobometo sub-rejiaun Oésilo, rekomenda ba  Autoridade Rejiaun Administrativa Espesiál Oekusi Ambeno (RAEOA) atu aselera prosesu indemnizasaun rai no uma, ne’ebé hetan afetasaun husi projetu alargamentu estrada husi Tono ba Oésilo.

Bento Bobo, nu’udar lia-na’in iha aldeia Oénoah, hateten, projetu alargamentu estrada husi Tono ba Oésilo, implementa dezde 2023, komunidade sira koopera di’ak maske afeta direita ba plantasaun, rai, uma, rate inklui bee-posu.

“Ami la ko’alia. Ami hakarak dezenvolvimentu tenke la’o di’ak, ne’e maka ami entrega rai ba kompañia hodi halo estrada ne’e, maibé Governu mós presiza hanoin ba ami, ami koopera di’ak, maske afeta ami-nia sasán sira-ne’e, agora ami husu iha kala’e ganti rugi (indemnizasaun) ne’e, ami la ezije maibé ami husu de’it, tanba tinan tolu ona, ami seidauk rona atu selu ami-nia sasán sira-ne’e, ami la taka dalan ba projetu ne’e, maibé ami husu de’it iha ka la’e,” nia hateten liuhusi diálogu aberta ho Prezidente Autoridade RAEOA iha aldeia Oénoah, foin lalais ne’e.

Eis-Xefe Suku Bobometo ne’e, orgullu tanba antes ne’e Governu liuhusi Autoridade RAEOA halo ona pagamentu ba plantasaun sira kuaze maioria suku Bobometo simu ona, hela de’it propriedade seluk hanesan rai no uma.

“Kona-ba ai-oan, ami agradese tanba barak mak simu ona, falta de’it rai no uma, ha’u fó ezemplu iha aldeia Oénoah, balun entrega metro lima to’o 50, balun uma kona tenke sobu ba buka fatin hela, oras ne’e ita haree estrada komesa la’o di’ak ona, entaun Governu mós presiza konsidera netik ami-nia sasán sira-ne’e,” nia rekomenda.

Notísia relevante:Komunidade promete fó kontribuisaun ba projetu estrada Oésilo

Iha fatin hanesan, Xefe Aldeia Oénoah, Cipriano Quenat, reforsa tan katak, komunidade sira iha aldeia Oénoah laiha intensaun atu eziije ka halo asaun, maibé tinan tolu ona, Governu mós presiza prosesa ona.

“Sei ami ezije karik, iha primeiru kedas, uluk projetu ne’e foin hahú, ami ejize ona no bele halo asaun, maibé nu’udar sidadaun ita tenke koopera no kontribui, agora ami-nia rekomendasaun ne’e mós la’os ezije maibé ami husu de’it, karik iha nia fundu bele prosesa ona,” nia hateten.

Notísia relevante:Autoridade RAEOA indemniza abitante afetadu na’in-58 iha Oésilo

Hatan ba rekomendasaun ne’e, Prezidente Autoridade RAEOA, Régioda Cruz Salu, rekoñese katak, indemnizasaun kona-ba rai iha sub-rejiaun Oésilo maioria seidauk ezekuta, tanba ekipa konjunta sei halo fali verifikasaun molok prosesa pagamentu.

“Iha 2023 ekipa balun rekolla ona dadus , liliu komunidade nia rai medida hira mak hetan afeta, uma hira mak afeta, uma ne’e nia modelu oinsa, uma fatuk ou uma tali, ida-ne’e ekipa sei tuun fila-fali mai atu halo re-verifikasaun, bainhira dadus sira ne’e kompletu ona mak foin ita prosesa, tanba fundu ba indemnizasaun kada tinan Autoridade RAEOA aloka kedas millaun $1-resin,” nia hateten.

Jornalista: Abílio Elo Nini

Editór: Rafael Ximenes de A. Belo