OEKUSI, 27 Maiu 2025 (TATOLI) – Abitante afetada plantasaun hamutuk uma-kain 58 iha aldeia Usapikolen, suku Bobometo, sub-rejiaun Oésilo, simu indemnizasaun husi Autoridade Rejiaun Administrativa Espesiál Oekusi Ambeno (RAEOA), tanba afeta direita ba projetu alargamentu estrada nasionál pakote II husi Tono ba Oésilo.
Pagamentu ne’e realiza tanba liuhusi kooperasaun Sekretária Rejionál Asuntu Terra Propriedade no Sekretária Rejionál Asuntu Agrikultura, halo pagamentu ba plantasaun hamutuk hun 20.250 ho baze orsamentu hamutuk rihun $125,917.00 ne’ebé aloka mai husi Orsamentu Jerál Estadu (OJE) 2025 nian.
Notísia relevante:DRTP Oekusi aloka millaun $1 fó indemnizasaun ba rai no propriedade
Sekretáriu Rejionál ba Asuntu Terra Propriedade, Marcelino Marques Coro, informa indemnizasaun ne’e bazeia ba deliberasaun autoridade RAEOA, númeru 2/2017, loron 31 fulan-Marsu, kona-ba valór kompensasaun ba plantasaun frutífera, ne’ebé afeta ba projetu alargamentu estrada.
“Prosesu pagamentu ne’ebé orsamentu iha, bazeia ba dadús submete husi servisu agrikultura, liuhusi Departementu Floresta, mak ita selu tuir dadús ne’ebé rekolla ona, ne’ebé ita la inventa dadus ho nia valór orsamentu, pagamentu ne’e ba de’it nia na’in la autoriza reprezentante, no valór ba ai-oan sira-ne’e, selu bazeia dekretu lei númeru 2/2017, ita selu bazeia baze legál ne’e tanba ne’e osan Estadu, osan povu nian tenke jere ho di’ak,” Coro, esplika ba komunidade sira iha aldeia Usapikolen suku Bobometo, sub-rejiaun Oésilo molok halo pagamentu.
Membru Autoridade ne’e, informa katak, pagamentu ne’e sei iha kontinuasaun ba sub-rejiaun seluk, liuliu ba projetu estrada, ne’ebé afeta direita komunidade sira-nia toos, natar no uma iha Oénunu sub-rejiaun Nítibe no fatin seluk tan,
Tanba ne’e nia enkoraja ba família afetadu na’in-58, katak osan ne’ebé Governu fó utiliza tuir nesesidade família, labele uza ba lia no estraga de’it, maibé presiza halo buat ruma ho valór, hanesan halo uma fó eskola ba oan sira inklui atende nesesidade família.
Notísia relevante:Autoridade RAEOA indemniza rai afetadu ba projetu ho kada metru² $5
Iha fatin hanesan, Sekretária Rejionál ba Asuntu Agrikultura, Filomena Sila, informa katak pagamentu ne’e realiza tanba dadus sira rekolla husi departementu floresta depois enkamiña ba iha servisu terra propriedade halo verfifikasaun finál mak foin halo pagamentu.
“Ne’e mak ohin ita halo pagamentu, la’os ai-oan ida de’it maibé iha espesia haat to’o lima, idak-idak ho nia presu ne’ebé Governu define ona, maibé pagamentu ohin ita haree maiora ai-teka mak barakliu,” nia fó hanoin.
Entretantu, Domingos Marques, nu’udar benefisiáriu, hato’o agradese ba Governu liuhusi Autoridade RAEOA, tanba bele selu ona komunidade sira-nia plantasaun ne’ebé hein kle’ur ona.
“Ha’u kontente ohin ami simu ona ami-nia direitu maske ki’ik ka bo’ot maibé Governu tau matan, hanesan ha’u-nian, afetadu iha plantasaun lima, goiava, sabraka, ai-teka, ai-ata, maibé ha’u-nian, ai-teka mak barakliu, ne’e mak ohin ha’u simu rihun $5-resin,” nia orgullu.
Notísia relevante:Autoridade RAEOA aprova deliberasaun halo pagamentu ba afetadu projetu ZEESM
Jornálista: Abílio Elo Nini
Editór: Florencio Miranda Ximenes
