Juri la konsidera pedidu re-integra kandidatu eskluidu na’in-rua ba Juíz STJ

DILI, 14 Setembru 2026 (TATOLI)–Ekipa juri husi Portugal ne’ebé komisaun kontrata atu halo selesaun ba Juíz Supremu Tribunál Justisa (STJ) no Tribunál Rekursu (TR) la konsidera pedidu husi Konsellu Superiór Majistratura Judisiária ne’ebé foin lalais husu atu re-integra kandidatu eskluidu na’in-rua ba vaga rekrutamentu Juíz STJ nian.

Prezidente Komisaun Rekrutamentu no Selesaun Juri ba Juíz, Avelino Coelho, informa, rezultadu selesaun dokumentu iha ema na’in-36 mak konkorre, enkuantu admitidu iha ema na’in-33.

“Iha ida mak deziste, ne’ebé kandidatu loloos ne’e iha 33. Kerdizer konkursu ne’e iha faze, primeiru mak avaliasaun dokumentál, ema hotu-hotu ne’ebé mak sente jurista liu 15 anos, Juiz ne’ebé mak sente katak nia iha esperiénsia profisionál liu ona 10 anos, Prokuradores Jersis ne’ebé mak nia esperiénsia profisionál liu 10, nia bele kandidata. Iha primeira faze husi totál kandidatu 36 ne’e juri halo avaliasaun, entaun juri halo avaliasaun rua parese la priense rekezitu. Entaun, juri dehan fó desizaun katak naun aptu, katak nia labele ba segunda faze ezame pur eskritu,” Avelino Coelho hateten ba Jornalista sira iha Aeroportu Internasionál Prezidente Nicolau Lobato, Komoro, Segunda ne’e.

Notísia relevante : Komisaun A husu garante transparénsia iha prosesu rekrutamentu juis ba STJ

Lei no regulamentu avaliasaun fó tempu iha loron 15 nia laran, aplikante sira bele halo reklamasaun.

“Ita-nia maluk na’in-rua ne’e halo reklamasaun depois prosesu juri sei haree hela, hanesan ita-boot temi Konsellu Superiór Majistratura Judisiária Timor-Leste parese dehan katak re-integra tan ne’e mak sala,” nia akresenta.

Nia dehan, Konsellu Superiór Majistratura Judisiária labele re-integra prosesu ne’e, tanba prosesu ne’e iha juri, nein iha kondisaun bele deside re-integra prosesu, tanba ne’e iha loron 11 Setembru juri deside ona katak sira na’in-rua la admitidu.

“Prosesu no lei ne’e, ita-nia kolega sira ema jurista ne’e komprende ka lae, ne’e purtantu labele,” nia tenik.

Iha biban hanesan, Komisária Carmelita Caetano Moniz, hateten, Komisaun labele fó sai kandidatu ida-ne’ebé deziste husi vaga ne’e tanba ne’e konfidensiál.

“Ne’e deskulpa, ami labele fó sai naran tanba ne’e konfidensiál. Sei publika iha Sentru Formasaun Jurídika Judisiária,” nia katak.

Nune’e mós, Komisáriu José Pedro Camões, haktuir, iha loron 18 Setembru kuandu hahú faze  ezame, lista ne’e iha hotu ne’ebá no sei taka iha Sentru Formasaun Jurídiku Judisiáriu Kaikoli tanba prosesu teste ba kandidatu Juíz Supremu no Tribunál Rekursu sei halo iha ne’ebá.

“Sira la komprende iha teste ne’e sira sei lakon oportunidade hanesan kandidatu sira ne’ebé konkorre. Agora ne’e ami mai iha ne’e, nia kontíudu jerál ne’e simu sira (juri), bemvidu sira mai iha Timor atu halo serbisu, agora ema balun kokorre, balun deziste sei iha nia andamentu to’o iha dia 18 Setembru ou kuandu sira mai sira verifika sira-nia identifikasaun katak sira ne’e sei tuir,” nia subliña.

Jornalista     : Natalino Costa

Editora          : Julia Chatarina